Sumuko, nahuli sa drugs bumaba ngayong Mayo

May 28, 2017 Metro BLISTT

Kumpara noong Abril, mas mababa ngayong Mayo ang bilang ng mga arrested drug users at pushers, at ng mga surrenderer dahil sa ilegal na droga base sa tala ng Drug Enforcement Unit ng Baguio City Police Office.
Mula Mayo 1 hanggang Mayo 23, umabot sa 13 na sangkot sa ilegal na droga ang naaresto ng mga pulis habang isa naman ang sumuko. Mas mababa ito kumpara noong nakaraang buwan kung saan 24 na sangkot sa droga ang naaresto habang pito ang sumuko.
Ayon kay Police Chief Inspector Dexter Ominga ng DEU, patuloy pa rin ang kanilang information operation o “taphang” kung saan isinasagawa ang seminars o pagpupulong at pakikipagdayalogo sa publiko partikular na sa mga driver ng jeep at taxi maging sa mga operators ng mga ito, mga vendors, entertainers.
“Hindi na namin ginagamit ang operation tokhang. We are using the operation “taphang” in a way na we are conducting information operation sa mga tao, encouraging them na mag-surrender habang maaga pa. Taphang dahil ita-tap natin sila at i-eengage namin sila in a form of pulong-pulong na lang to surrender, hindi na iyong bahay-bahay.”
“Doon sa tokhang kasi, kapag pinuntahan ka, para na ring sinasabing pusher ka na. Kapag sa taphang kasi, information operation nga lang.”
Paglilinaw ni Ominga na lahat ng naaaresto partikular sa iligal na droga ay kanilang kinakasuhan. Mananatiling detainee ang mga ito habang hinihintay ang desisyon ng korte.
Ayon kay Ominga, kalahok ang mga drug surrenderers sa mga activities sa ilalim ng pangangalaga ng Department of Social Welfare Development.
Mula noong natigil ang operation tokhang dahil sa pagputok ng isyu ng human rights violations o ang mas nakilalang “extrajudicial killing”, patuloy ang kapulisan sa Baguio City sa pagpapatupad ng revisitation kung saan binibisita ng mga pulis ang mga dati nang sumuko. Ayon kay Ominga, kapag napatunayang gumagamit muli ang mga dati nang sumuko ay subject for police operation ang mga ito.
Hinihikayat ni Ominga ang komunidad na himukin din ang mga drug user o pusher na sumuko na lamang sa pulisya. “We will help them na magbagong buhay.”
Aniya, nananatiling lehitimo ang kanilang operasyon sa DEU kung ipapasok ang nagdaang kontrobersya ng extrajudicial killing. “Huwag nating pag-usapan iyong EJKs when it comes to drug operations kasi [legitimate] ang ginagawa naming drug operations. Sino naman ang makakapagsabi na EJK ang nangyari kapag pinatay ang isang tao? So, we don’t condone iyong EJK dito sa PNP. Since iyan na iyong ginamit nilang term mas lalo na sa media, sinabi kapag namatay na iyong tao, sinabi na na EJK. Hindi namin tino-tolerate ang mga member ng PNP na mag-conduct ng sinasabi nilang EJK. Kino-condone namin ang EJK sa BCPO since we all know na it is a form of criminal activity kapag EJK. Talagang kino-condemn namin iyong paggawa ng EJK pagdating sa drug operations.” Adrian Trinidad, UC Intern / ABN