SUMVAC 2017, nagsimula na sa Baguio

Inaasahang masusulit ng mga bisita ang kanilang bakasyon sa lungsod sa mga inihanay na aktibidad para sa Summer Vacation (SUMVAC) in Baguio ngayong Abril.
Pangunahin dito ang religious activities na binuo ng ecumenical at inter-faith groups sa lungsod para sa mga residente at turista at itinakda sa Holy Week.
Ang Stations of the Cross ay gaganapin sa Abril 7 sa Our Lady of Atonement Baguio Cathedral, 4pm habang 9pm naman ang the Soaking! Overnight Prayer Meeting sa EHCMI Center 3rd Floor, Hilltop Market.
Ang Blessing of Palms ay itinakda sa Our Lady of Atonement Baguio Cathedral Square, 4:45pm-6pm ng Abril 8 at 4:45am-7pm sa Abril 9.
Iba’t ibang Holy Week services ang isasagawa sa mga simbahan mula Abril 10-16 na magtatapos sa pagsasagawa ng inter-faith Easter Sunrise worship rites sa Abril 16, 5am sa Malcolm Square.
Si United Methodist Church Bishop Rudy Juan ang tatayong guest speaker sa programa na tatampukan ng mga panalangin ng paglilimi, pasasalamat, pamamagitan, at pagsamba.
Ang aktibidad ay pangungunahan ng Baguio-Benguet Ecumenical Group at Baguio Character City Council sa pamamagitan nina Rev. Abraham Kuis, Dr. Philian Weygan at Erlinda Tindo.
Sa Abril 9-11, ang Alpha-Omega Theatrical Production ay ipapakita sa unang pagkakataon sa lungsod ang Senakulo dakong 6pm sa Melvin Jones grandstand.
Ang tatlong gabi na presentasyon ay bubuuin ng 250 na cast at libre ang kanilang pagtatanghal.
Ang Jesus Miracle Crusade Inc. ay magtitipon sa Abril 13-16 na susundan ng “Iglesia ng Dios kay Kristo” Thanksgiving sa Abril 20, 9am-5pm at ng Jehovah’s Witnesses Annual Circuit Assemblies sa Abril 22-23, 7am-5pm habang ang 2nd North Luzon Kids for Christ Family Conference ay Abril 28-30, 8am-8pm/7am-10pm/7am-12pm, lahat sa Baguio Convention Center.
Gugunitain din ng lungsod ang Araw ng Kagitingan sa Abril 9 at ang Liberation Day sa Abril 27 sa Veterans Park.
Sa Abril 8, itatanghal ang Spiritual Journey Art Exhibit nina Joel Cristobal at Celso Pepito sa Camp John Hay, 11am.
Ang mga trainings naman sa Abril 7 ay “Philippine Veterans Week” Medical Mission and Symposium sa Baguio Convention Center; sa Abril 17-19 ay Youth Prophetic Conference sa Baguio Convention Center, 9am-6pm; Abril 23, Pastoral Care Seminar sa Philippine Baptist Theological Seminary, 8am; Abril 24, International Seminar-Workshop on Early Childhood Education sa Cooyesan Hotel Plaza, 8am; at Abril 24-26, “Int’l Strategic Management” Training for Teachers and School Heads sa Baguio Convention Center.
Ang iba pang aktibidad ay Alab ng Puso Fun Run sa Athletic Bowl, Abril 2, 4am; Healthy Living Orientation and Concert, Baguio Convention Center, Abril 11, 9am-7pm; Foamy Fun Run, Athletic Bowl, Abril 23, 5am; at SATS Chorale Concert (Saint Andrew’s Theological Seminary), Cathedral of the Resurrection, Magsaysay, Abril 28, 6pm.
Marami pang aktibidad ang inihanay din para sa buwan ng Mayo. APRefuerzo, PIO / ABN

Amianan Balita Ngayon