Super typhoon

September 25, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan, kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna, nagasat nga aldaw kadakayo nga awan malabsan sukimi.

Simmangbay ti super typhoon Ompong…adu dagiti nakumikom a nagsagana, adda met dagiti pilosopo a nagkunada signal number two ngem agin-init met kanun ngem idi damo dayta. Adu met dagiti agkuna nga agkararag tayo. Adu ti inkam madillaw wenno madlaw no kasta a dumteng dagiti kakastoy a didigra. Kuna diay kumpadrek a maysa a Board Member iti maysa a probinsia. Adu ti agkuna nga agkararag tayo kunada…apay, sada la malagip to agkararag no adda didigra? Koma, kanayon nga agkararag tayo, ah. Ngem puera delos buenos a kunada, adu ti kasta, Kayong Angkuan, sada la malagip ti Apo no adda rigat wenno didigra a dumteng.

Maysa pay, kailian, kayong Angkuan, nadlaw tayo a nai-sentro ti imatang ti amin iti maysa a Senador sakbay daydi super typhoon Ompong ngem nalipatandan ti panagsaganada maipapan iti napadpadaanan a super bagyo a kunada. Nalipatanda ti panagsagana wenno contingency plan kunadansa itay. Ay, ina, sadanto man la agtignayen no madaman ti bagyo, addanto man ketdi ti agkuna ditan nga opisyal iti “Hindi Ko Alam”…maria kusina.

Malagip tayo ti isyu maipapan iti maysa a senador a nadakamat tayo, masdaaw kami met idiay Kayong, saan la ngaruden a nangiruar ti korte iti search warrant ken arrest warrant para kenkuana mabuteng pay laeng a rumuar idiay senado, sus maria, talaga a nag-hotelen idiay. Isu nga adu payen ti mangyang-angaw a saansa met a lalaki, hahaa. Unay daytan, ket no nagtured. Isu pay ti nangidaulo idi iti kudeta a no sadino ket sinaklopda pay ti maysa a hotel idiay siudad ti Manila. Ita, mabuteng a rumuar idiay Senado? Sus maria kusina a talaga.

Ala, lipaten tayo pay laeng man dayta nga isyu ta adu ti rumbeng a mas priority a mapagsasaritaan nangruna iti didigra wenno delubio nga insangbay ti bagyo Ompong a kunada a super typhoon gapu iti kapigsa ti anginna. Kaasi la unay dagiti mannalon a no sadino ket nadadael weno pinaagepna ti daga dagiti kaaduan a pagay ken dandani agdawa met dagiti dadduma. Kayatna a sawen, agrisgo manen ti apit ket kumirang manen ti bagas. Nupay kasta, impanamnama ti benneg agrikultura a nawadwad ti inangkat ti pagilian a bagas manipud iti sabali a pagilian. Iti initial ken immuna a pattapatta da billion a pesos ti pateg ti naperdi a gapuanen ti ulpit ken ranggas ni Ompong. Iti benneg ti dadduma a probinsia ken il-ili iti umamianan a Luzon, sanikua ti nadadael ngem iti probinsia ti Benguet adu ti natay gapu iti landslide, bayat a masursurat daytoy a kolum tayo madama pay laeng ti rescue ken retrieval operation iti napasamak a landslide iti maysa nga ili ti Benguet a no sadino ket maipapan nga aganay a sangagasut wenno nasursurok pay dagiti nagaburan. Manu nga aldawen ti napalabas sipud binayo ni Ompong ti Northern Luzon, a kayatna a sawen, napukawen ti namnama ti kaaduan a sibibiag pay dagiti biktima. Ala, ti laengen maaramid tayo ket agkararag a sapay koma ta sumaklangda iti Apo a Namarsua.

Anak ti tukling a balo, kasta pay kakayong ta ne, overtime tayo manen ket…ala, aglisi ka man dita Atong. Ania man ta isensenyasmon…anunsio iti hueteng… agingga ita, dayta pay laeng ti ubram. Ala, ala, kalagem ngarud tay opisyal a takrot! Kasta pay ket ne, nakaadu tayo manen, babayoo, tsup tsup muahmuah.