Tagong yaman, ibabalik ng mga Marcos?

September 3, 2017 Daplis Walang Mintis Opinion

Hanooo??? este, anooo??? Ibabalik ng mga Marcos (daw) ang kanilang mga tagong yaman? Teka lang pards, medyo may na-wrong spelling yata tayo o mali ang pandinig! Ibabalik ba o isosoli? Teka, parang parehas din, eh! Spelling lang ang magkaiba, di ba? Kasi pag ibabalik, ibig sabyan ay may kinuha. Kahit pa isoli, ibig sabihin – may kinuha ka rin, di ba? Sa mas mababaw na kataga, may ninakaw ka, di kaya? Teka, lalo yatang gumulo ang usapan. Umayos tayo, pards.

********
Nang mawala sa poder ang late Pres. Marcos, inakusahan siyang diktador. Bago siya namatay sa Hawaii, naakusahan siyang nagnakaw sa kaban ng bayan. Pero sa ngayon, may kasama na palang mga bareta ng ginto! Akala namin baretang sabon lang ang meron. Yun pala ay bareta ng gold na pala ang usapan. Susmaryusep! Bumibigat ang kontrobersiya, pards. At ano ba ang mga ire? Ill-gotten ba o nakaw na yaman? Di ba iisa rin ang ibig sabihin? Inenglis lang, di ba? Kung hindi ill-gotten, sabi ng isang tsismoso, bakit mo raw isosoli? Bakit ka magbabalik ng isang bagay na kinuha mo nang legal? Kapag nakuha sa illegal, di ba nakaw? Mariakusina impusipos, pare-parehas din yan eh! Aba’y sinong niloloko nila? Relaks lang, pards. Di pa tayo tapos.

********
Matagal nang hinahabol ng gobyerno ang ill-gotten wealth ng mga Marcos. May tsismis nga riyan na may sampung bilyong dollar accounts sila sa ibayong dagat, eh. Meron ding ibinulgar ng dating Mayor ng Manila na si Rep. Lito Atienza na may pitong toneladang ginto raw ang mga Marcos. Tsinismis daw ito sa kanya ni Mrs. Imelda Marcos. Eh, sino ba ire? Hoy, misis yan ni Makoy. Kongresman ngayon yan. My God! Ibig sabihin, mga hinahabol, nakabalik na gobyerno? Matagal na, bok! Parang ngayon ka lang nasilang. Ang mahirap, ngayon lang ulit nagigising ang isyu ng nakaw na yaman. Ano bang nangyari? Paano, mismong si Pres. Duterte ang nagsabing may bumulong daw sa kanya na gustong tumulong ang mga Marcos sa ikatatag ng bansa sa isyu-pinansiyal. Ginoong nakapalda! Kay tagal nang pinaghahabol ang mga yaman na yan, bakit ngayon lang gustong ibalik? Kinuha ba talaga o ninakaw?

********
Para sa mga kagaya nating tuliro sa isyung magulo, heto ang katwiran daw ng mga Marcoses, ayon sa ulat: ayon kay Digong (base sa impormante niyang taga-Kampo-Marcos) na pinoprotektahan lang daw noon ng dating pangulong Ferdie Marcos ang ekonomiya ng bansa sa panahong nagkakagulo (kudeta?) at inisip daw niya na makakabalik pa siya sa Palasyo kaya itinago muna ang mga yaman na yan kasama na ang ilang bareta ng ginto. At dahil sa malaki raw ang deficit spending ng gobyerno ngayong panahon, naisipan ng mga Marcos na isauli ang bahagi ng yaman ng mga Marcos baka sakaling makatulong. He he, medyo may punto pero, talagang may kaguluhan pa rin ang punto eh! Kasi sa tinagal-tagal ba naman ng nagdaang panahon na hinahabol sa iyo ang isang bagay, bakit ngayon mo lang naisipang isoli? Di ba, maliwanag daw na may punto kang gusto mo itong angkinin? Hayy, magulo talaga. Hindi lang blurd, baluktot yata. Kasi, sabi ng mga gurang na kakilala ko: ibig bang sabihin, kapag nagnakaw ka at isosoli mo, wala ka ng pananagutan? Ano ka, Robinhood? Anak ng tikbalang. Pag ito ay tinanggap ng lipunan, darami pa ang magnanakaw. Kaya sir President, sabi ng marami, isip-isip muna bago kumilos. Hmmm, kung kami ang tatanungin, he he… paalam na lang muna kami. Adios mi amor, ciao, mabalos!