Taiwan University at ASUS, sinanay ang ALS sa Bauang

July 16, 2017 Provincial

BAUANG, LA UNION – Sa muling pagbisita ng Southern Taiwan University of Science and Technology (STUST) at pakikipagtulungan ng ASUS Foundation sa pamamagitan ng Fil-Chi Love and Care Foundation sa bayan ng Bauang, La Union ay isinagawa ng 10 araw na Basic Computer Training Program para sa mga mag-aaral ng Alternative Learning System (ALS) kabilang na ang 40 mag-aaral na mga out of school youths (OSYs), miyembro ng 4Ps at moral recovery fighters ng Bauang.

Ang organisasyon ay namigay rin ng 50 yunit na computer sets maliban sa isinagawang training mula Hulyo 9 hanggang 21, 2017 sa ALS Training Center, Bauang North Central School.

Nauna nang nagbigay ng 60 na yunit ng computer mula sa STUST at ASUS at nagsagawa rin sila ng pagtuturo noong Agosto 2015.

Sinabi ni Bauang Mayor Eulogio Clarence Martin P. De Guzman III, “Ang inyong mga programa ay isang magandang regalo para sa taong-bayan ng Bauang, hindi lamang para sa mga computer na inyong naibigay ngunit sa kadalubhasaan at kaalaman sa mga computer na ibabahagi niyo sa aming mga kalahok.

“Magkakaroon kayo ng magandang karanasan sa iyong pamamalagi dito sa aming bayan, dahil sa mayamang kultura at tradisyon ng Bauang.

Aniya, ang programa ay magbibigay sa mga mag-aaral ng pangunahing kaalaman sa computer operation na magagamit nila para sa mas mataas na edukasyon, kabuhayan o trabaho.

“Mapapalawak din nito ang kanilang kamalayan sa ibang mga kultura sa pamamagitan ng pagsasama ng kultura ng Taiwan sa programa at mapapabuti din nito ang kalidad ng buhay at personalidad ng mga kalahok,” ani De Guzman.

Ang programa ay pinahusay na sa Computer System Servicing, upang maging accredited sa Computer Literacy.

Ang mga nagtapos ng programa ay bibigyan ng National Certificate (NC II) sa pamamagitan ng Technical Education and Skills Development (TESDA) na kailangan ng mga kalahok sa pag-aaplay para sa lokal at trabaho sa ibayong-dagat.

Ang programa ay dinaluhan ng Sangguniang Bayan Members, Alexander Romeo Obong, Danilo Abuan, Warlito Daus, David Ballesil, department heads ng LGU, mga kinatawan ng ASUS na pinamumunuan ni George Su, manager, at Dr. Su Ying-HSU, associate professor ng Dept. of International Business, at TESDA provincial office head Marissa Alcantara sa Farmer’s Hall, Munisipyo ng Bauang noong July 10, 2017. ABN