Tapal, pigket, kabit ditoy

Naimbag nga agsapa, aldaw, malem wenno rabii kadakayo amin kabarangayan, kakayong, gagayyem ken saan nga amammo. Sumangbay manen kadagiti nadayaw a matmata yo toy kolum tayo ket sapay la koma ta naikkaten dagiti sangkap kadagiti mulagat yo. Kumusta kayo metten Kakayong?

Bayat a sursuraten tayo daytoy a kolum tayo kabarangayan, kaarrubami ida, isu met ti panangrugi ti panagkampania dagiti local a kandidato.

Ngem kas intay napaliiw, idi pay laeng a nangrugida. Limed wenno diskarte pinoy a kunada. Kanayonda kadagiti natayan, buniag ken lamayan. Isu pay ket dayta diay ibagbaga tay kumpare tayo a sutil a KBL wenno Kasaran, Buniagan ken Lamayan party.

Uray iti lokalidad, kaarruba, adda dagiti nadamdamagko a pilan sa pay kanu ti panagawat iti bayad ti botos wenno panagwarasdan sa iti kuarta.

Unay ket daytan aya, dikay kadi makadlaw kailian, dikay makuenta? Manu la’t sueldo aya ti sangguniang bayan, municipal mayor, agingga iti congressman? Ngem adda dagiti elected local officials nga inton malpas ti 3 a terminoda wenno tay kunada nga agraduate, nagdakkelen ti immasensuanna, malaksid no ammom nga adda met mabalinna.

Uray pay, nagdakkel ti gastosna a nagkampania, manu la’t sueldona? Kasanu a mabawina ti dakkel wenno minilyon a gastana? Dikay kadi agsalsaludsod iti bagbagiyo, kailian?

Saan nga amin, kailian ngem adda ngarud dagitay napailiw tayo a kasta ti nagbanaganna. Naglupos a kasla beklat a kunada. Isu a kuna ni kumparek, pulitikakuarta.

Kayatna a sawen, no awan kuartam, awanen. Uray ngata kasayaatenen ti platapormam a kunada, no awan kuarta, narigat a makaruarka.

Ngem no adda kuartam, uray kunada payen nga ex-convict ka wenno awan naturposmo nga adal, dakkel ti gundawaymo a mangabak.

Iti laengen barangay level, no saannaka a binitibit ti maysa a dakkel a religious group wenno bassit ti kumaprem wenno dika nagited iti pangtoma a kunada kadagitay adda latta iti sango ti tersina nga agur-uray ti mangted isukmonna, awanen, narigatkan a lumsot.

Isu a pulitika-kuarta itan Kayong Angkuan. Isu nga uray saan koma a kualipikado tay maysa a kandidato nga uray manu pay asawana wenno adda aminen kenkuana a bisyo, namnamaem Kayong, 99% ti gundaway na a mangabak.

Saan kadi a pudno ti paliiwko, Kayong? Daytoy manen ti maysa nga intay siputan, kaarruba, kakayong ken kabarangayan.

Adda dagiti makuna a posting area tunggal barangay. Kitaenyo ta adu latta dagitay sulpeng a paspasurot dagiti kandidato, ta saan met ket a dagitay kandidato ti mapan agipegket wenno agikabil iti poster wenno tarpaulin.

Ti punto de vista tayo ditoy ket rumbeng a bagbagaan wenno bilinenda a husto dagiti supot wenno supporters da, kangrunaan a kitaen yo ket dagitay mapan agilansa iti poster kadagiti poste ti koriente ken iti puon ti kayo ta saan yo nga ibotbotos dagita.

Dandanin malpas ti makuna a panagkampania dagiti national candidate ket adda metten dagiti nangngegtayo a radio kas kada TV ads da.

Awan pay ti nangibaga para iti environment restoration wenno panakasaluad wenno pannakaisubli ti kinangayed ti nakaparsuan.

Dandani agpapada amin a plano wenno plata porma da ket para kadagiti marigrigat. Piman pay ni nakurapay wenno marigrigat ta agpatingga lattan a maar-aramat kas material tunggal panawen ti basingkawel wenno election.

Daytoy nga inkam ibagbaga kailian ket palagip kadatayo a botante. Adda met laeng kadatayo no ipalubos tayo nga agtuok wenno akanganga tayo manen iti tallo a tawen.

Ala, Kakayong, kasta pay ta naimasan tayo manen. Nalipatak tay awis ni partner, nga inkam agkape idiay ayuyang dagiti pada a nataraki a dual citizen. Babayoo, tsuptsup, muahmuah.

Sirmata ken Tagtagainep ni Mang Gusting

Amianan Balita Ngayon