Tayong lahat ay maaaring maging biktima ng nCov, pag-iingat kailangan

February 10, 2020 Editorial

Nasa mataas na alerto ang Department of Health (DOH) sa 2019 novel coronavirus (2019- nCoV). Dahil sa virus ay nagkasakit ang mahigit 30,000 katao sa China at iba pang bansa sa Asia, Europe, North America, at Australia at pumatay sa mahigit 600, karamihan sa kanila mula Wuhan, China kung saan nagsimula ang impeksiyon.
Ang opisyal na tala ng pagkamatay ng mga Chinese habang sinusulat ito mula ng biglang paglaganap ng coronavirus ay umakyat noong Pebrero 7 sa 636 habang sinasabi ng gobyerno na ang kabuuang impeksiyon ay umakyat na sa mahigit 30,000.
Ang talaan ay tumaas sa bagong pagkamatay ng 73 mula sa epidemiya ayon sa National Health Commission sa kanilang araw-araw na update.May dumagdag na 3,143 bagong kaso ng impeksiyon ang kinumpirma kaya umabot na sa kabuuan na 31,161 ang kontaminado sa bansang China.
Ang sentrong probinsiya ng Hubei kung saan nagmula ang virus ay patuloy na tinatamaan ng matindi na nakapagtala ng panibagong pagkamatay na 69 na iniulat sa loob ng 24 oras noong Enero 7. Sa napaulat na impeksiyon, mahigit 4,800 dito ay nasa seryosong kundisyon.
Patuloy na nagsisikap ang mga awtoridad ng China upang mapigilan ang paglaganap sa kabila ng pagutos na manatili sa loob ng bahay ang milyon-milyong tao sa mga siudad na kulang na ang mga ospital na nagsisikap tugunan ang tumataas na bilang ng maysakit.
Ang nakahahawang sakit ay lumitaw sa Wuhan, kapitolyo ng probinsiya ng Hubei, China noong Disyembre na kumalat sa ibang lugar ng China at mahigit 2 iba pang bansa na nag-udyok sa World Health Organization na magdeklara ng isang global emergency.
Ang bilang ng kumpirmadong impeksiyon sa China ay patuloy na tumataas kung saan mahigit 26,00 tao ang pinagsususpetsahang nahawaan ng sakit. Sa ngayon ay may 45 Pilipino na nagpahayag ng kagustuhan na makabalik sa Pilipinas mula Hubei at isinasaayos na ng Department of Foreign Affairs at nakikipag-ugnayan sa mga awtoridad ng China para sa mga kaukulang clearances.
Dito sa Pilipinas, sinusuri ngayon ng DOH ang 215 tao sa 2019 novel coronavirus (2019- nCoV) simula Pebrero 7, ang bilang ay mas mataas sa iniulat na 178 noong Pebrero 6. Sa kabuuang 215, 185 ay ipinasok sa ospital, 17 ang pinalabas, habang 3 ang namatay, dalawa dito namatay hindi dahil sa novel coronavirus.
Sa 215 pasyente, 48 dito ang nasuri nang negatibo sa virus habang ang resulta ng 127 ay hinihintay pa. May kumpirmadong 3 kaso na ng novel coronavirus sa bansa.
Ang pagtaas ng bilang ng mga “patients under investigation” ay humantong matapos matunton ng DOH ang lahat na 441 contacts ng unang dalawang kumpirmadong kaso. Ang dalawa na naglakbay mula Wuhan, China papunta sa Cebu at Dumaguete City bago humingi ng tulong medikal sa Manila.
Sa 441 contacts, 32 ay isinama sa 215 na iniimbestigahan ng DOH habang 302 ay nasa ilalim ng home quarantine dahil walang nakitang sintomas.
Inilabas ng DOH ang talaan ng mga pasyente sa bawat rehiyon :Ilocos Region – 3, Cagayan – 4, Cordillera Administrative Region – 4, Central Luzon – 19, Metro Manila – 78, Calabarzon – 24, Mimaropa – 4, Western Visayas – 22, Central Visayas – 16, Eastern Visayas – 12, Northern Mindanao – 9, Caraga – 2, at Davao Region – 18.
Mula ng pumutok ang isyu sa 2019 -novel coronavirus ay umani na rin ng batikos at paninisi ng mga netizens sa social media sa mga Chinese.
Katakot-takot na pag-aalipusta at paninira ang ibinabato sa mga Intsik. Sa isang banda ay hindi natin masisisi ang mga netizens dahil maliban sa n-CoV na problema ay marami pang mga kaso ang kinasasangkutang ng mga Chinese sa bansa na lalong nag-papainit sa mga ulo ng ilan nating kababayan.
Ang isyu sa pagkamkam nila sa ating karagatan, mga krimen sa droga at prostitusyon, kidnapping at paglaganap ng pasugalan at idagdag pa dito ang pagka-arogante ng mga ito.
Maraming kaugalian, tradisyon at kultura ang namana ng Pilipino sa mga Intsik, isa na dito ang pagluluto at pagkain. May mga lugar din sa Pilipinas na mahilig tayo sa “exotic foods” at ang pagkakaroon ng coronavirus na ayon sa mga eksperto ay pinaghihinalaang sa “paniki” nanggaling at nagkataong sa Wuhan, China nagsimula.
Walang may gustong humantong sa ganitong kalagayan, ang mga Intsik, tayong mga Pilipino at iba pang mga lahi ay pawang mga biktima, kaya sa halip na magsisihan, mang-alipusta ay tumulong na lamang tayo sa mga paraang alam nating ikabubuti imbes na ikasasama. Ang taimtim na panalangin at pag-iingat ang tangi nating sandata ngayon sa lumalaganap na sakit at ipanalangin din natin na maayos na magampanan ng mga kinauukulang ahensiya ang kanilang trabaho upang malunasan ang nakamamatay na sakit na ito.