Trabaho.. trabaho..!

May 26, 2019 Opinion Sirmata ken Tagtagainep ni Mang Gusting

Nalpasen ti election. Kas intay nakuna, lipatenen ti ginnura, ngem ketdi agtitinnulong tayo koman. Dagiti met napagasatan, sapay la koma ta tungpalen tayo dagiti inkarkari tayo.

Panunoten yo, no dikay tungpalen, agdas-al met la kadakayo ta saan kayton a makapidua a kunada. Koma, saan tayo nga aramiden a negosio ti pulitika a kunada a nagpailayon ka tapno bumaknang ka.

Ania a biag ni Juan dela Cruz wenno Mang Angkuan. Wen, kakabsat mi a kalkalpas a nabotosan nga opisyales iti kalkalpas nga election, manipud kina-Senador agingga iti kina-Sangguniang Bayan iti Municipal Level, trabaho..trabaho.!

Adu dagiti nagsansanuong a naabak, adda met dagiti nagkuna a nasaur da wenno ania pay dita. Ti kaladingitan, isu ti pannakaabak dagiti naipagarup a naggatang iti botos. No intay kitaen ti linteg, kakailian, nagbaba ti naikeddeng a gastosen ti maysa a kandidato tunggal botante.

No ditay agbiddut, tres (3) pesos laeng tunggal tao no adda partido ti kandidato ken lima (5) pesos no independent candidate. Korekendak no bidddut, kakabsat. Ngem manu ti ammoyo a ginastos dagiti kandidato kadagiti nadayaw a lugaryo?

Ala, saanen a dayta ti intay pagpapatangan ta kastan ti taray ti pulitika wenno basingkawel iti pagilian. Adda nabasa mi a kolum nga adda gimmastos iti nasurok nga uppat a gasut a milyon iti tv ken radio ads laeng.

Ket manu ti populasyon ti Filipinas itan? Nalpas ti nalpas a kunada. Adda ditan dagiti nangabak wenno napagasatan a kandidato.

Nalpasen ti proklamasyon nga agingga iti kina-Senador. Ngarud, awanen mabalin tayo pay. Iti met local level a kunada, adu dagiti kabarbaro ken nag-uubing a nakaruar.

Adda ka dita a kaubingan a mayor a kunada ta no ditay nagriro ket 23 yrs. old na laeng. Kuna da, kasanu kanu a mapataray na ti gobierno na wenno siudad na? Nupay nagturpos ti ama na kas mayor iti nasao a siudad, nupay daytoy naubing a mayor ket isu ti nagbalin nga SK president, saan laeng nga isu daytoy intay dakdakamaten ti naubing a nabotosan a Mayor.

Adda pay iti Metro Manila ket kasla saan a maaklon ti maysa a beterano a pulitiko nga inabak laeng dagiti agtutubo wenno agkabanuag pay laeng. Adu da idiay Metro Manila.

Ti laeng makuna mi, saan a maala iti innubingan ken kaadda ti padas ti maysa nga agbalin a nasayaat a lider. Ada amin met ket nangrugi wenno naglasat iti panagdadamo, saan kadi?

Ti ketdi nasayaat, tulongan tayo ida. Idalan wenno igiya ida tapno maipaay da ti husto a serbisio. Ngarud, kakabsat a nabotosan ken inikkan wenno kinawesan dagiti umili iti pagrebbengan wenno responsibilidad a mangkita iti pagsayaatan dagiti lumugar ken mismo nga ili wenno siudad.

Koma, diyo liplipatan dagiti inkay inkarkari. Dagiti kari a di koma itayab ti kali ngem kas iti nakuna mi idi napalabas a kolum tayo a di koma pagbalinen a negosio ti pulitika.

Puwera delos Bueno a kunada. Adu ti bimmaknang a pulitiko ken natured da a gumastos iti dakkel a no panunoten, manu ti sueldo da?

Adu ti tumaud a saludsod kadagiti managpaliiw nga umili. Nagdakkel ti ginastos ni Apo Kandidato, kasano a masubbot wenno maisubli ti gastos na? Kasano met a makakurakot no bilang?

Ala, sapay la koma ta panagserbi ti intay ipangpangruna ken pagimbagan ti lugar ken lumugar kas inkay inkari idi panagkakampania.

Kuidaw kayo no di yo tungpalen dagiti kari yo. Dikay makapaminduan, laglagipen yo tallo tawen yo laeng nga agtakem, isu a trabaho..trabaho..!