Tree planting program ti 1590 EC, dinayaw ni Gov. Pacoy

July 9, 2017 Provincial

BAUANG, LA UNION – Dinayaw ni Gov. Francisco Emmanuel “Pacoy” R. Ortega III ti suporta ti 1590 Energy Corporation (1590 EC)  iti National Greening Program (NGP) kalpasan ti naisayangkat a tree planting program isi Hunio 29, 2017 sadiay compound dagitoy iti Barangay Payocpoc Sur, Bauang, La Union.
Pakairamanan dagiti volunteers a nakipaset ket dagiti representatives manipud iti Department of Environment and Natural Resources-Environmental Management Bureau (DENR-EMB), Armed Forces of the Philippines (AFP), Provincial Information and Tourism Office (PITO) ti Provincial Government of La Union (PGLU), local government unit ti Bauang, ken dagiti empleado ti 1590 EC.
Kinuna ni Pacoy a daytoy a ganuat ket maysa a nasayaat nga ehemplo ti corporate social responsibility (CSR) ken suporta iti administrasionna a mangipangpangruna iti preserbasyon ken panangisakit iti daga a nakaiparsuaan.
Adda ti pakabulan a 3,000 seedlings ti naiwaras kadagiti partner agencies, 500 kadagitoy ti naimula kabayatan ti pagteng.
Kas paset ti Lorma Community Development Foundation Incorporated (LCDFI) iti greening program, nangidonar daytoy ti 1,200 seedlings babaen kenni Executive Director Antoinette S. Tejano.
Nagpasalamat met ni Engr. Alberto F. Badillo, general manager ti 1590 EC, kadagiti partner agencies ken kadagiti amin a participants. Nakaawat ti plaque of appreciation amin a representative dagiti organisasion a nakipaset.
Ti nakuna a lugar a tagikua ti PGLU ken imanmanehar ti 1590 EC ket maysa a power plant nga addaan 215MW-capacity diesel engine. Nangrugi ti operasion ti planta idi July 1995 ken mangmangted ti nayon a supply iti Luzon Power Grid. MARCEL A. FLORENTINO, PITO-La Union / ABN