Tuition fee iti 13 pagadalan ti Rehion1, ngumato

SIUDAD TI DAGUPAN – Inaprobaran ti Commission on Higher Education (CHEd) a maingato ti tuition fee ti 13 a pagadalan manipud iti 92 private Higher Education Institutions (HEIs) iti Rehion1, mangrugi tatta nga school year.
Segun kenni CHEd Region1 senior education program supervisor Danilo B. Bose, ti tuition fee ket maingato laeng iti 0.9 per cent, maibasar iti kangrunaan nga inflation rate iti Pangasinan, La Union, Ilocos Sur ken Ilocos Norte.
Kinunana kabayatan ti forum ti Kapisanan ng mga Brodkasters sa Pilipinas (KBP) ditoy siudad a ti average increase ket aggatad ti P28.
Dagiti pagadalan a napalubusan a mangingato ti tuition ket pakairamanan ti Divine World College iti Vigan, Ilocos Sur; STI Educational Services Group iti Laoag City, Ilocos Norte; Lorma Colleges, Saint Louis College, ken STI San Fernando iti La Union; bayat nga iti Pangasinan ket Lyceum Northwestern-Urdaneta, Lyceum Northwestern-Dagupan, Agno Valley College iti Malasiqui, PASS College iti Alaminos City, Perpetual Help College iti Malasiqui, Phinma University of Pangasinan sadiay Urdaneta, STI Dagupan, ken Phinma University of Pangasinan sadiay Dagupan.
Innayon ni Bose a dagiti nakuna a pagadalan ket nagkonsulta kadagiti estudiante ken nagannak pakairamanan ti sabali pay nga stakeholders ket immanamong dagitoy iti percentage ti nayon a masingir tunggal estudiante.
Insumitir dagiti HEIs amin a dokumento maipapan kadagiti naisayangkatda a konsultasyon iti CHEd manipud pay idi Disiembre ti napalabas a tawen.
Segun iti pagannurutan, mabalin nga ag-apply dagiti HEIs para iti tuition increase tunggal tawen ngem kasapulan nga agtungpal dagitoy kadagiti amin a requirement. LVM/PNA / ABN

Amianan Balita Ngayon