Unayen dungngo!

September 18, 2017 Opinion Sirmata ken Tagtagainep ni Mang Gusting

Gusting: Apay a nakamisuotka Angkuan?

Angkuan: Masuronak ngamin idiay balay, uliteg Gusting.

Gusting: Apay, ania’t kasuronmo aya?

Angkuan: Kasanu met ngamin uliteg, inaldaw nga ibagada a sadutak isu nga inaldaw met a planok ti pumanaw.

Gusting: Ne…apay ngarud a dimo matultuloy a pumanaw?

Angkuan: Masadutak, uliteg. [hahahahaha]

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malibtawan. Kayat dakayo man a kumustaen kadagiti nadayaw a luglugar yo. Ni Kayong Angkuan, kasanu ti biag, naimbag no saan dakayo a nadalapus la unay ti bagyo. Sa ket nagsasarunoda… ngem, ala, sapay la koma ken Apo tayo a Namarsua ta awan unay naapektaran kakayongmi dita ta no ditoy batugmi a langit, kaasi ti Apo ket awan met dagiti naipadpadamag ita a landslide kas kada nalayus. Isu a makunatayo a nagasat tayo pay laeng ta saan tayo a naipada piman kadagiti kailiantayo iti umabagatan a kasta unay a namsaakan dagiti naudi a nagsaruno, ni di pay ket dandani naggiddan da…tay kunada, naimbag laengen ta saanda a nagsanib puwersa ta di ket sus maria kusina, Ikit kuanang ania, adu man koman ti agsansanuong.

Unayen aya dungngo dagitoy a maar-aramid wenno mapaspasamak kadatayo ita. Ditay latta maliklikan dagitoy a didigra ngem dakkel pay laeng a yaman tayo ta saan tayo a napakaruan kadagitoy a didigra. Saan a kas idiay America a kasta unay ti namsaakan kadakuada dagiti ibagbagada a huricane, sa idiay met Mexico nagpigsa a panagdayyeg wenno ginggined. Diosko pakawanennakami, ania itan dagitoy a mapaspasamak aya dungngo. Koma, kakayong dita, agbalbaliw tayon sakbay a magabay ti amin. Agbabawi tayon kadagiti basbasol tayo….

Kasano met ngamin, Kayong Angkuan, ditoy laengen pagiliantayo, nagadu a parikut ngem dida met la malmalpasen nga agtitinniplak iti rupa este agsisinnapol iti basol. Kasano met ngamin, basol ni Juan, basol ni Pedro lattan sapsapulenda imbes koma nga agpandaydan iti linteg para iti pagimbagan tayo nga umili. Dida met la makapampanawen iti senate hearing maipapan iti nasurok a 600 a kilos ti shabu kanu a napuslit idiay custom. Sus mariosep, adda ar-aramidenna amin a pamuspusan tapno mairamanna ti anak ti presidente nga adda ammona iti daytoy a shipment. Sus Ina aya, makasuya nga isyu daytan. Kuna met iti sabali a kampo, daytoy a mammanday linteg ti adu ti bank account na iti sabali a pagilian a no sadino ket naggapu iti illegal drugs ti nasao a kuarta. Sus maria kusina, unayen aya dungngo dagitoy a maar-aramid itan, pinniltak ditoy, pinniltak idiay…no putahe koma ket makasuyan ta isu lattan ti linaon dagiti damag, mabuya a damag ti TV ken mangngeg a damag iti radio. Maria Kusina kayo…

No kaano kakayong nga aggibus dagitoy a parikut, dayta ti saantayo nga ammo. Amangan no aggibus manen daytoy a tawen nga awan man laeng makuna a pagimbagan tayo a naaramidan dagiti madaydayaw a senatong este senador ken tongressman este congressman. Saan met ketdi nga amin ket awan ar-aramidenna ngem ti makapasiodot, imbes nga agpandayda iti linteg he-hearing met ar-aramidenda, apay korte da aya? Ay ket sorry a, Apo a madaydayaw, agdamdamag kami laeng.

Ala, kayong, nalpas manen ti puli. Naimasak metten ti naki-innistorya kadakayo ti sango ti tiangge ni Ikit Kuanang. Baliwan tayo to manen ta ne, dakesen, amangan isurotda manen ti binalsig. Nalipatak tay pagatgatang ni Sofing a bukayo ken paminta…babayo, tsuptsup muahmuah.