Welcome 2019, pero?!
Heto na si 2019. Siya na ang bida. Kung merong mga kontrabida sa taong 2018, leksiyon na lamang natin sila. Pero ano ang dapat gawin sa kasalukuyang taon upang hindi na kumalimbang muli ang mga eksenang nagpabigat sa ating buhay sa nakaraan? Kayo, ako, ikaw, tayong lahat…dapat magkaisa upang ating isulong ang nagkakaisang hakbang tungo sa mas matatag na 2019. Pero…papaano kaya natin maitutulak ang unang hakbang na yan, mga pards kung sandamukal pang mga tinik sa ating landas? Sige, ating hahalukayin at lapirutin hanggang sa pinakamaliit na himaymay ng mga Pero, Bakit at Ano sa landas nating tatahakin:
******
Habang sinusulat ang espasyong ito, nadadagdagan pa ang bilang ng mga namatay, sugatan, missing at mga natrahedya sa mga lugal na inupakan ng bagyong si Usman. Mahigit sa pitumpo na ang patay at tiyak na mararagdagan pa habang isinasagawa ang rescue at retrieval operations. Papaano ba ang nangyari? Bakit humantong sa ganyan ang trahedya? Ayon sa mga analista, sa tuwing may parating na sungit ng panahon na maaring magbunga ng kalamidad, paulit-ulit na nagpapasabi ang pamahalaan hinggil sa kahandaan kasama na ang paglilikas lalo na sa mga lugal na delikado sa bagyo. Ngunit dahil sa tigas ng kukuti kaya may mga nabibiktima. Hindi nagpapabaya ang pamahalaan sa isyu ng paglilikas. Ngunit sadyang marami ang ayaw sumunod dahil sa maraming kesyo at quetenggo quetal. At ang masaklap, kapag may mga biktima na, saka isisisi sa
gobyerno. Haay buhay, magbago na tayo. Kung ano kasi ang utos, sundin upang walang sisihan sa bandang huli. Kawawa naman si gobyerno, hane? Walang pinag-iba ito sa isang taong nasa lansangan, siya na nga ang bumangga sa sasakyan, ang driver pa rin ang may kasalanan. Pwe!
******
Sa katatapos na selebrasyon ng Pasko at Bagong taon, may pagbabago naman kung mga sugatan dahil sa paputok ang usapan. Mas kakaunti raw ngayon, ayon sa DOH, ang naging pasaway. Sige, andiyan na kami at malaki ang naitulong ng maagap na pagkilos ng mga ahensiya ng gobyerno hinggil dito. Pero ang masakit, mahigit sa beinte ang kaso ng walang habas na pagpapaputok ng kanilang armas. Pito sa kanila, ayon sa ulat, ang pulis o otoridad. Maryusep! May mga napaulat ding tinamaan ng ligaw na bala dahil sa mga hungkag na mga nagpaputok ng armas. Napag-alamang kakastiguhin na ng PNP ang mga pasaway na mga pulis. Bulong: dapat hindi lang basta sibakin na sa puwesto ang mga yan kundi sibakin na bilang pulis para magtanda. At dagdag pa: hindi lang sana pagsibak kundi samahan pa ng mas mabigat na parusa. Kung yong isang isnatser na nang-isnatch para may pambili ng ulam ikinulong, ano pa kaya ang isang otoridad na nagpaputok ng baril na alam niyang bawal lalo kung nakapanakit ang ginawa.
******
Noong 2018, sangkaterbang mga paglabag sa batas ang naganap dahil sa illegal na droga. Meron daw naparusahan pero mga kuting lang. Yong mga matatabang isda, tinitimbang pa raw, ang alin? He he, dapat sa taong 2019, baguhin na ang ratsada. Mga higante ang bitayin, sabi nila. Kung puwede raw ay firing squad na. Marami ang nagtataka. Kahit halos araw-araw na may nahuhuli sa illegal drugs operandi parang hindi maubos-ubos ang mga suspects. Papano nga mauubos kung may mga kakutsaba naman kasi sa loob ng gobyerno? Ngakk!
******
Sa nakalipas na taon, marami na ang sinibak ng Duterte Administration dahil sa korapsiyon! Sa pamamagitan kaya ng pagsibak sa kanila ay lutas na ang kakurakutan? Owsss, upak ng marami. Sabi nga nila: walang kabusugan ang mga demonyong kurakot. Sagpang dito at doon kahit halos puputok na ang bituka. Sila ang dapat tutukan ng pamahalaan sa taong ito lalo pa’t maraming demonyo ang mamamayagpag dahil panahon ito ng eleksiyon. Tiyak na maglilipana muli ang mga mapagsamantalang negosyante na ang puhunan ay pulitika. Iisa lang ang maiiwan naming tapik, mga pards: ang pulitika ay turing na isang salot dahil nagpaparami ito ng mga Bulag, Pipi at Bingi sa lipunan. Hindi sa nilalahat ngunit kapag nakaupo na ang mga nabotohan, marami sa kanila ang nagiging Bulag sa problema ng bayan, at ang nakikita ay problema lang ng kanyang bulasa; may nagiging Pipi, walang dila kahit alam ang katiwalian; at Bingi sa daing ng bayan dahil sarili na lang ang kilala, wala ng iba. Belated happy b-day pala kay bosing Tom ng Amianan. Adios mi amor, ciao, mabalos!
Enlisting technology to aid traffic flow
January 11, 2019