15 ganggannaet, 7 Pinoy natiliw iti cybercrime iti Ilocos Norte

October 27, 2018 Headlines

CAMP BGEN OSCAR M FLORENDO – Arestado ti 13 Taiwanese, 2 Chinese ken 7 Pilipino iti anti-cybercrime campaign nga impatungpal dagiti operatiba ti kapulisan ti Rehion1 iti pannakibinnadang ti Anti-Cybercrime Group ken Drug Enforcement Group ti Philippine National Police iti Ilocos Norte-Abra road, Brgy Medina, Dingras, Ilocos Norte idi agsapa ti Oktubre 24, 2018.
Segun kenni Police Chief Superintendent Romulo E. Sapitula, regional director ti Police Regional Office 1 (PRO1), dagiti suspek ket natiliw iti telephone fraud iti nasao a barangay.
Nakumpiskar ti nagduduma nga computers, telephones, 52 slot machines, ken sabali pay a maus-usar iti ilegal nga aramidda. Adda pay nakita nga certificates of discharge from jail gapu iti panaglabsing ti Republic Act 9165 wenno Comprehensive Dangerous Drugs Act of 2002.
Binigbig ni Sapitula dagiti suspek nga isuda Wu Pei Yu, Juan Wang, Lien Teng Yu, Chen Feng Tsa, Wei Han Lai, Shao Wei Zeng, Zeng Hui, Chiahui Sun, Chin Kai Lai, Jun Zer Chen, Liang Ou Chun, Shao Wei Wu, Jhih Hong Chen, Chin Jen Huang, ken Shu-Cheng Wu; Ronald Allan Santos, Eduardo Gabutan, Edwin Ronquillo, ken Michael Santos, amin ket naggapu iti Valenzuela City; Christian Gach Malaqui manipud Sarrat Ilocos Norte; ken Rocino Velarde ti San Jose Del Monte, Bulacan.
Naaresto dagiti suspek babaen ti panangipatungpal ti Search Warrant Number 18-28800 gapu iti panaglabsing iti section 4 ti Republic Act 10175 (Cybercrime Prevention Act of 2012) nga inruar ni Judge Maria Victoria A Soriano-Villadolid ti Regional Trial Court Branch 24, Manila. PRO1/ABN