16K KANAYONAN A MANNURSURO INABRASA DAGITI MANNURSURO TI ILOCOS

May 31, 2025 Headlines

SIUDAD TI LAOAG, Ilocos Norte

Inabrasa dagiti public school teacher ti Ilocos Norte ken Ilocos Sur idi Lunes iti panagaprubar ti Department of Budget and Management (DBM) a mangtangdan iti kanayonan a 16,000 mannursuro ken 10,000 non-teaching personnel para iti School Year 2025-2026. Ti tignay ket kas sungbat iti awag ni Presidente Ferdinand R. Marcos Jr. a mapalag-an iti administratibo a trabaho ti Department of Education
(DepEd) ken mangited iti kanayonan nga oras para dagiti mannursuro tapno maingato dagiti galad ken pasayaaten ti kalidad iti panangisuroda.

Iti maysa nga interbiu, kinuna ni Michael Malvar, maysa a mannursuro ti Sarrat National High School idiay Ilocos Norte, nga iti panangala iti kanayonan a DepEd Personnel ita a tawen ket masya a dakkel a tulong para kadagiti pagadalan ta daytoy ti mangpabalin kadagiti mannursuro nga ad-adda nga agpokusda iti panangisuroda ken makissayan ti paperwork ken dadduma pay a trabaho. “Ipakita iti daytoy a tignay ti pudno a suporta para kadagiti mannursurotayo ken sigurado a magunggonaanto dagiti estudiantetayo,” kinuna ni Malvar. Kas maysa a mannursuro iti 15 a tawen, imbaga ni Tricia Genirosa Ancheta, manipud Binacud Integrated School iti Sinait, Ilocos Sur nga addaanda laeng iti maysa nga administrator assistant a mangimaton iti paperwork.

“Kas maysa nga integrated school, adda koma uray tallo nga administrative aides para iti elementary, junior high school ken senior high school tapno makissayan iti trabahomi,” kuna ni Ancheta. Ni Madelyne Alegado, maysa a multigrade teacher iti Sideg Elementary School
sadiay Paoay, Ilocos Norte, ket kinunana nga iti panangbalanse kadagiti panangisuro ken non-teaching a trabaho ket makabusbos iti oras.
“No dagiti non-teaching a trabaho tayo ket makissayan, ad-adda a makapokustayo iti panangipaay iti de-kalidad nga edukasion kadagiti
estudiantetayo,” kuna ni Alegado. Sakbay nga agretiro inton umay a tawen, kinuna ni Leonora Melchor, maysa a Grade 1 teacher ti Mariano Marcos Memorial Elementary School iti Batac City, Ilocos Norte, nga kayatna a makita nga ad-adu nga administrative aides ti agtrabaho iti paperwork para kadakuada.

“Kas maysa a mannursuro, ti panangtangdan iti kanayonan a non-teaching personnel ket makagunggona kadakami. Sapay koma ta
maitudingda kadagiti pagadalan ken saan laeng a kadagiti division office gapu ta nakaad-adu iti paperwokmi a saanen a maibturan,” kinunana. Malaksid iti curricular ken extracurricular nga aktibidades kadagiti pagadalan, kinuna dagiti dadduma a mannursuro ditoy nga iti panangisagana kadagiti lesson plan ken sabali pay a pamay-an ti panangisuro ket makabusbos met ti panawen, isu nga iyawidda
dagiti saan pay a nairingpas a trabahoda.

(PNA-Ilocos/PMCJr.-ABN)