17 dati a rebelde sadiay Ilocos Sur nakaawat benepisio ti E-CLIP benefits

February 4, 2020 Provincial

ILOCOS SUR – Sangapulo ket pito a dati nga miyembro ti Militia ng Bayan (MB) manipud sabasabali nga barangay iti probinsia iti nakaawat iti tulong pinansial kas paset iti Enhanced Comprehensive Local Integration Program (E-CLIP) benefits.

Iti MB ket dagiti indibidual nga nadoktrinahan ken direkta wenno saan a direkta nga karaman iti naranggas nga armado nga pannakidangadang ngem, nu maorganisa ket mabalin nga mangted iti adu a suporta para iti “rebolusyonario a panagtignay” ti Communist Party of the Philippines (CPP), New People’s Army (NPA) ken National Democratic Front (NDF).

Iti sidong ti E-CLIP, iti dati a miembro ti MB, CPP, NPA ken NDF ken dagiti kangrunaan a pamiliada, nga agtarigagay nga talikudannen iti armado a pannakidangadang ket nailatang nga addaan pakete ti tulong tapno agbalinda a produktibo nga umili.

Iwanwanwan iti Department of the Interior and Local Government (DILG), nagted iti E-CLIP ti nasurok a PhP1 milion a gated ti tulong pinansial a binukel iti dagus nga livelihood assistance ken firearm remuneration wenno bayad kadagiti armas kadagiti simmuko sadiay probinsia nga umuna a masertipikaan iti Joint AFP-PNP Intelligence Committee (JAPIC).

Iti pannakaibunong ket naaramid idi Enero 27 kalpasan iti dua nga aldaw a Peace-Building Seminar nga addaan tema, “Embracing Peace Within Ourselves Towards a Better Living,” (Aginnarakup iti Kapia nga Agturong iti maysa nga Nasaysayaat nga Panagbiag),nga inkondukta iti Philippine Army iti pannakikadua iti provincial government nga indangdanguluan ni Govenor Ryan Luis Singson.

Nagyaman ni Major Renante Carsano, executive officer ti 81st Infantry Battalion (IB), 7th Infantry Division (7ID) iti provincial government ken saba-sabali nga ahensia ti gobierno ken dadduma pay a sektor iti panagreggetda tapno agtalinaed iti kapia ken panagprogreso iti probinsia.

Kinuna ni Maj. Carsano, “Agadup 124 miembro iti Underground Mass Organizations (UGMOs) manipud saba-sabali nga barangay iti Ilocos Sur iti nagkaykaysa para daytoy a dua ng aldaw nga Peace-Building Seminar ken umuna daytoy a gundaway nga daytoy a pasamak tapno agtalinaed iti kapia ken panagprogreso ket naaramid ditoy probinsia. Mainanama a saan nga maudi daytoy.

Babaen ti agtultuloy nga suportayo kadagiti programa ti gobierno nga mangipaay iti kapia kadagiti tagasuporta ti rebelde., kaadduan kadakuada ket mabalin nga makagun-od iti benepisio ti E-CLIP ken matagiragsakda ti progresibo nga panagbiag.”

Iti sabali a bangir, nangibunong ni Gov. Singson iti cash assistance manipud provincial government iti tunggal barangay nga nakipaset iti nasao a seminar.

“Dawdawaten iti provincial government iti pannakitinnulongyo nga agkaykaysa ken suportaran iti panagregget iti gobierno para iti kapia ken panagprogreso,” kuna ni Singson.

Nakigimong met dagiti pannakabagi iti nadumaduma kadua nga ahensia a kas sumaganad: Office of the Presidential Adviser on the Peace Process, DILG, Technical Education and Skills Development Authority, Department of Social Welfare and Development, Department of Agriculture, Department of Trade and Industry, Philippine Information Agency, and the Philippine National Police.

JMCQ/PIA Ilocos Sur/PMCJr.-ABN