1K AGINDEG TI ILOCOS SUR NAKAAWAT TI TULONG PINANSIAL MANIPUD DSWD

July 1, 2023 Headlines

REHIYON TI ILOCOS

Agdagup iti 1,000 nga agindeg iti probinsia ti Ilocos Sur iti nakaawat ti tulong pinansial manipud Department of Social Welfare and Development (DSWD) idi Lunes, Enero 26. Tunggal benepisario ket nakaawat iti PhP3,000 ken maysa a grocery package babaen iti Assistance to Individuals in Crisis Situations (AICS) program ti DSWD. Segun iti Provincial Social Welfare Development Office, dagiti benepisario ket residente nga adda iti krisis wenno persons with disabilities (PWDs), solo parents, senior citizens, ken agtutubo a kiniddawda ti tulong iti edukasion.

Ni Neil Galano, 37, agindeg iti ili ti Santa Cruz ket maysa kadagiti benepisario. Nasurok a 12 tawenen ita a pasiente ti dialysis ni Neil. Gapu iti limitado a gubuayan iti sapul ken nangina a gatad ti dialysis, nakarigrigat para iti pamiliana a masustiner iti panangagasna. “Tumultulongak iti balay
wenno panagtalon no kabaelak ngem no saan, umasidegkami kadagiti nagduduma nga ahensia wenno opisina ti gobierno tapno maituloyko iti panangagasko isu nga dakkel a tulong daytoy kaniak,” kunana.

Ni Anghel Isabelo Olliero, 77, residente iti ili ti Magsingal ket inyebkas na met ti panagyamanna iti tulong ti gobierno. Imbagana nga usarennanto ti kuarta para iti panangagasna iti asthma ken para iti inaldaw a kasapulanda iti asawana. “Agpannuraykami laeng nga agassawa iti ited a tulong ti gobierno kas iti senior citizen pension. Iti sakitko, iti inhaler ti pudno a nangina ngem babaen ti tulong dagiti agduduma nga opisina nga asitganmi, iti asi ti Dios ket makagatang kami latta,”
kunana.

“Agyamankami unay iti tulong ti gobierno, agyamankami unay ta prioridadyo kami a nakurapay,” innayonna. Malaksid iti tulong a kuarta manipud DSWD, iti opisina ni Senador Christopher
Lawrence “Bong” Go nga adda iti bayat ti seremonial a panagiwaras, ket nangted met iti basketball, sapatos, bisikleta ken cellphone, ken dadduma pay.

(JMCQ-PIA Ilocos Sur/PMCJr.-ABN)