2 KONSEHAL TI URDANETA BINALLAAGAN ITI PANAGKEDKEDDA A MANGAKEM ITI PUESTO TI MAYOR, BISE MAYOR

February 8, 2025 Headlines

URDANETA CITY, Pangasinan

Ti Departament of Interior and Local Government (DILG) ket namakdaar iti dua a konsehal ti siudad ti Urdaneta a mabalin a madusada para iti panangbaybay-a iti annongenda (dereliction of duty) no agkedkedda nga agtugaw a mayor ken bise mayor kalpasan iti pannakasuspende dagiti agdama nga opisial ti siudad. Pinakdaaran ti Department
of the Interior and Local Government (DILG) dagiti konsehal ti siudad ti Urdaneta a da Franco Del Prado ken
Warren Andrada a mabalinda a sanguen dagiti darum gapu iti panangbaybay-a iti annongenda no agkedkedda a
mangakem kadagitoy a puesto.

Ni DILG Ilocos Region Director Jonathan Paul Leusen Jr. ket personal nga inserbina iti bilin idi Martes, Pebrero 4, a
nangiturong kada Del Prado ken Andrada nga agtakder a kas acting mayor ken vice mayor, kalpasan a nasuspendeda Mayor Julio Parayno III ken bise mayor Jimmy Parayno III idi Enero 7, 2025. Agpada a nasuspende dagiti dua a Parayno iti 12 a bulan gapu iti maipapan a di umiso a kababalin ken panangabuso iti autoridad (grave misconduct and abuse of authority).

Ti suspension order ket naibatay iti kaso a naidatag maibusor kadakuada ni Urdaneta City Liga ng mga
Barangay President Michael Brian Perez idi Oktubre 2022. Impaganetget ni Leusen a ti pannakasuspende dagiti dua
nga opisial ket agtalinaedto a maipakat agingga maipatungpal iti dusa a naituding kadakuada. “Ket padpadasenmi a
danonen ida (Del Prado ken Andrada) tapno akemenda dagiti puesto a kas acting Mayor ken acting Vice Mayor.
Daksanggasat ta saanmi a nadanun ida,” kinuna ti opisial ti DILG iti maysa nga interbiu. “Namnamaenmi a makitada nga obligadoda a mangakem kadagiti posision kalpasan ti suspension order,” kinunana. Kinuna ni Leusen a nakiumanda met kadagiti pangulo ti departamento maipapan iti advisory.

(LY-PNA/PMCJr.-ABN)