2024 PRODUKSION TI BAGAS TI LA UNION NALABLABES NGEM TI LOKAL A PANAGKASAPULAN

April 26, 2025 Headlines

SIUDAD TI SAN FERNANDO, LA Union

Nangpataud ti La Union iti 127.8 a metriko tonelada a bagas idi 2024, a nanglablabes iti dagup a tinawen a konsumona ken mangpatibker iti saadna kas maysa a rice self-sufficient a probinsia. Ti datos nga inruar ti Office of the Provincial Agriculturist idi Abril 21 ket mangipaganetget iti agtultuloy a panagkumit ti probinsia iti seguridad ti taraon ken lokal a pigsa ti ekonomia. Nagun-od ti probinsia ti rice sufficiency level a 137 a porsiento, kayatna a sawen a nakapataud iti 37 a porsiento nga ad-adu a bagas ngem iti nakonsumona—epektibo a
mangkissay iti panagpannuray kadagiti importasion ti bagas ken mangpababa kadagiti mainaig a gastos.

Kadagiti 20 nga ili ti probinsia, addaan ti San Juan iti kangatuan a produksion a 11,610 metriko tonelada, a sinaruno ti Agoo nga addaan
iti 10,778 MT, ken ti Bangar nga addaan iti 9,928 MT. Inrekord met ti San Juan ti kangatuan a lebel ti kinaumdas iti 264 a porsiento, a sinaruno ti Burgos iti 254 a porsiento, ken ti San Gabriel iti 246 a porsiento. Ti rice output ti probinsia ket iturturong ti 71,201 a mannalon ti bagas—46,838 a lallaki ken 24,363 a babbai. Ti Agoo ket addaan iti kaaduan a mannalon nga addaan 6,108, a sinaruno ti Balaoan nga addaan iti 5,448, ken ti San Gabriel nga addaan iti 5,000.

Segun iti gobierno ti probinsia, ti nangato a rice output ti La Union ti mangipasigurado iti agtultuloy a suplay agpadpada iti konsumo iti sangkabalayan ken panagnegosio kadagiti dadduma a probinsia. “Daytoy a lebel ti produksion ti mangipasigurado iti inaldaw a taraon iti tunggal lamisaan ken mangipalubos a maiwaras ti bagas ti La Union kadagiti dadduma a probinsia,” kunana iti maysa a pagsasao. Ni Felix Villanueva, 64, ti Agoo, ket nangiyebkas ti namnama a ti natalged a nangato a produksion ket mangiturong iti nababbaba a presio ti bagas.
“Maragsakanak ta mangpataudkami iti bagas iti nangato a lebel. Namnamaek a daytoy ket mangiturong iti pannakakissay ti presio ti bagas tapno ti nagrigatan a kuartatayo ket makagatang iti ad-adu,” kinuna ni Villanueva Itultuloy tiRehion ti Ilocos, dagiti programa ti gobierno a nairanta a mangpalaka iti presio ti bagas.

Idi Septiembre 2024, inrugin ti National Irrigation Administration (NIA) Rehion 1 ti Bagong Bayaning Magsasaka (BBM) rice program idiay Ilocos Norte, a nangitukon ti PhP29-per-kilo a bagas kadagiti solo parents, persons with disabilities, ken senior citizens. Naaramid ti isu met laeng a programa idi Nobiembre 22, 2024 idiay Vigan City, Ilocos Sur, bayat ti maika-10 a job fair ken one-stop-shop ti probinsia, a nakailakoan ti 500 a supot ti bagas, a tunggal maysa ket agdagsen iti 10 a kilo. Agtultuloy ti panaglako ti NIA iti nalaka a bagas iti
tunggal Biernes idiay Ilocos Norte. Pinasayaat pay ti La Union iti suporta ti mannalon idi 2024. Idi Abril, 40 a grupo dagiti mannalon ti nakaawat iti PhP1.7 milion a gatad dagiti pestisidio, abono, ken hybrid seeds kas panagsagana iti nabasa a panawen ti panagmula.

Idi Oktubre, 82 a kooperatiba ken asosasion ti naikkan iti PhP15.5 million nga alikamen iti talon, a pinunduan ti Tobacco Excise Tax.
Kinuna ni Sharon Viloria, provincial agriculturist ti La Union, a nailasin met ti PhP3- million manipud iti Agricultural Emergency Trust Fund ti probinsia, iti sidong ti Provincial Ordinance No. 425-2023, tapno matulongan dagiti mannalon ken mangngalap a naapektaran iti El Niño. Ti napigsa a produksion ti bagas ti La Union ket mangsuporta iti seguridad ti taraon, lokal a panagtagilako, ken pannakagun-od iti nalaka a bagas para kadagiti komunidad.

(CCMT, PIA LU/PMCJR.-ABN)