36 awardees, nabigbig iti Pammadayaw 2018 ti LU

March 10, 2018 Headlines

SIUDAD TI SAN FERNANDO, LA UNION – Binigbig ti probinsial a gobierno ti La Union dagiti 36 awardees a nagserbi ken nakatulong tapno dumur-as ti probinsia ken dagiti umili.
Naited dagiti pammigbig iti tinawen a Pammadayaw a nasayangkat idi Marso 1, 2018 iti Diego Silang Hall, Provincial Capitol, ditoy siudad.
Paset latta daytoy ti pannakarambak ti 168th foundation anniversary iti probinsia.
Kadagiti napadayawan, tallo ti nakaawat ti Saranay Award, ti kangatuan nga award nga it-ited ti probinsia: Lt. Gen. Rolando Joselito D. Bautista, commanding general ti Philippine Army; Judge Samuel R. Martires, associate justice ti Korte Suprema; ken ni Lt. Gen. Glorioso V. Miranda, retired commanding general iti Philippine Army ken agdama a miembro ti board of directors ti Bases Conversion Development Authority.
Ti Diego Silang Award, ti award para kadagiti saan a residente ti probinsia, ket inawat ni Engr. Ashley Antonio iti Department of Health-RO1.
Adda 27 nga La Union Service Awardees (LUSA), 20 ditoy ket soldado a naggapu iti La Union a nakiranget iti Marawi siege: PFC Jethro Fil C. Estacio (Posthumous Award); PFC Herman D. Abat, PFC Jomar B. Abuan, Sgt. Diony C. Andrada, 1Lt. Mark Rolly Bacani, Cpl. Marlon M. Banayag, Sgt. Danilo V. Bañez, Cpl. Jesus A. Cabrera, Cpl. John Carlo V. Diso, 2Lt. Jordan C. Estacio, Sgt. Romnick C. Estacio, Pvt. Denver D. Estoesta, Sgt. Jerry B. Gagucas, Maj. Rick L. Ganuelas, Cpl. Christopher Gil N. Garcia, Sgt. Teddy A. Macadenden, Cpl. Dharyl Nodora, Pvt. Randall Ian A. Rivera, ken PFC Kleft A. Velasco.
Nakaawat met ti LUSA ni DBM- RO1 Regional Director Nenita A. Failon; Atty. Emmanuel Lorenzo J. Mapili (Posthumous Award); Marites Balbin Nuval a presidente ti OFW association sadiay Hong Kong; Mary Eu Ann R. Ordoño, head ti Special Olympics-La Union Chapter; Brig. Gen. Perfecto M. Rimando Jr., commander ti 5th Infantry (Star) Division, Philippine Army; ken PCSupt. Romulo E. Sapitula, regional director ti PNP-RO1.
Ti Abel Award, pammigbig kadagiti NGOs wenno CSOs a nakabase iti ruar ti probinsia ngem nakatulong kadagiti programa ti PGLU, ket naited iti Science of Identity Foundation Community Assistance for Responsible Existence (SIFCARE) a nakabase iti Makati City ken idadauloan ni Milagros Celeste. Ti SIFCARE ti mangipatpatungpal kadagiti programa kas ti CURMA wenno ti panangsalaknib ken panangsalimetmet kadagiti pagnaedan dagiti pawikan iti San Juan, La Union.
Most Outstanding Lupong Tagpamayapa ti Barangay Parian, City of San Fernando, iti maikatlo a nagsasaruno a tawen.
Kampeon ti Lengguahe iti media category ti Bombo Radyo-La Union ken iti individual category ket ni Education Supervisor Elsa Calado ti San Fernando City Division, DepEd.
Most Outstanding Entrepinoy Award ti Gwenysa Bamboo Enterprises a tagikua ti agassawa a Dale ken Betty Ramos iti Tubao, La Union. Mangilaklakoda kadagiti produkto kas ti sabon, shampoo, cookies, ken supplements manipud iti activated bamboo charcoal technology.
Kinablaawan ni Governor Francisco Emmanuel “Pacoy” R. Ortega III dagiti amin a nakaawat ti pammadayaw ken nagyaman daytoy iti naitedda a serbisio iti probinsia. Kangrunaan a binigbig ti gobernador ti kinatured dagiti kameng ti Armed Forces of the Philippines manipud iti La Union a nakiranget tapno mawaya-wayaan ti Marawi.
“Your likes are the role models of our younger generations. You are the treasured assets of La Union and we need more people like you in our society,” kinuna ni Vice Governor Aureo Augusto Q. Nisce iti panagkablaawna kadagiti awardees. PITO LU / ABN