4K MANGANGALAP NAKAAWAT TI TULONG MANIPUD GOBIERNO TI ILOCOS SUR

May 24, 2024 Headlines

SIUDAD TI VIGAN, Ilocos Sur

Agarup 4,000 mangngalap ti Ilocos Sur iti nakaawat kadagiti motorized fiberflass boats, life vests, ken headlights manipud iti gobierno ti probinsia idi Mayo 20 iti selebrasion ti Farmers and Fisherfolks’ Month. Daytoy ket maitunos iti 10- point One Ilocos Sur agenda iti agdama nga administrasion iti sidong ti agricultural productivity.
Imbaga ni Governor Jeremias Singson a dagitoy a ganuat ket panggep a tulongan dagiti mangngalap iti kasasaadda, nangruna kadagiti karit nga inyeg dagiti isyu ti aglawlaw ken teritorio.

Kinunana, “Mangiwarastayo apo ti bangka nga mausaryo ti panagkalap. Adda met ti flashlight ken life vest tapno
masiguradotayo ti safety-yo no adda man ti saan a nasayaat a pasamak no addakayo ti taaw. Sapay koma apo ta usarenyo dagitoy tapno nasalun-atkayo latta nga agawid kadagiti pampamilyatayo aglalo itatta ta masangwanan manen ti panagtutudo.” Sigun kenni provincial agriculturist Erlinda Baltazar, dagiti motorized fiberglass boats ket naiwaras kadagiti 43 a mangangalap a napukaw dagiti bilogda kalpasan ti Super Typhoon Egay idi Hulio 2023.

Ni Felix Barrientos, mangangalap manipud barangay Puro iti ili ti Caoayan ket nakaawat iti maysa a life vest ken
maysa nga headlight. Dimmakel iti maysa nga isla, imbaga ni Barrientos nga iti panagkalap ti kangrunaan a pagbiagan ti pamiliana iti adu a dekada ken agkalap sipud pay idi agtawen iti 14. Kinuna ni Barrientos, “Dakkel a tulong dagitoy naited kaniami ita ta ammotayo a ditoy barangaymi ket ado ti maiwawawa wenno maiyaw-awan no
dadduma ket kasapulanmi unay dagitoy. Importante la unay dagitoy lalo no dumakkel ti alon ket adda maaramatmi a mangisalakan kadakami no maiwawakami.”

Pinadayawan met ni Marites Mecos, fishery coordinator ti city government ti Candon iti gobierno ti probinsia iti kanayon a suportada kadagiti mangangalap ti probinsia nangruna iti Siudad ti Candon. “Dagiti interventions
naggapu iti city government of Candon, provincial government ken dagiti nadumaduma a national government agency a katulunganmi, babaen kadagitoy ket simmayaat ti pagsapulan ken panagbiag dagiti fisherfolkmi,” kinunana.

(JMCQ- PIA Ilocos Sur/PMCJr.-ABN)