50K HOUSING UNITS A SIDONG TI 4PH PUNTIRIA TI PANGASINAN

June 21, 2024 Headlines

PANGASINAN Naikeddengen iti gobierno probinsial ti Pangasinan iti panangrugi ti Pambansang Pabahay para sa
Pilipino Program 4PH) a puntiria a mangibangon iti 50,000 housing units iti uneg ti sangapulo a tawen a mangrugi ita a 2024. Iti maysa nga interbiu idi Huebes, imbaga ni Provincial Human Settlements and Urban Development Authority head engineer Alvin Bigay nga iti 4PH ti probinsia ket awatenda dagiti sangakabbalayan manipud iti
formal ken informal sectors.

Dagiti formal sector, kinunana, ket dagiti empleado ti gobierno nga agtarigagay a maaddaan ti bukodda a balay bayat a dagiti informal sector ket dagiti agnanaed kadagiti napeggad a lugar wenno dagiti informal settlers/iskwater, ngem iti prioridad kat dagiti marigrigat a pamilia. Kinuna ni Bigay nga iti tentatibo a puntiria a luglugar para iti housing projects ket idiay ili ti Lingayen, Umingan, ken Binmaley. “Ti regular a gatad ti interes para kadagiti housing
unit ket innem a porsiento. Iti sidong ti 4PH, ti lima a porsiento ket subsidia ti nasional a gobierno,” kinunana iti pagsasao a Tagalog.

Imbagana nga umawat itan ti opisinada kadagiti aplikasion idiay Kapitolio ti probinsia ti ili ti Lingayen. “Mabalinda a bumisita iti opisinami tapno ipamatmatda ti panggepda ken punnuan dagiti porma a maipatolodto iti Department of Human Settlements and Urban Development (DHSUD) para iti pannakaaprobarda,”kinunana. Imbaga ni Bigay a
makisarsaritan iti gobierno ti probinsia kadagiti dadduma a developer ken puntiria ti ground-breaking inton
sumaruno a bulan.

Imbagana nga ikonkonsidera ti gobierno probinsial dagiti agduduma a modalidad tapno maipatungpal ti programa kas iti joint-venture agreement no sadino nga ti daga ket ited ti probinsial a gobierno ken pondoanto ti developer ti land development ken vertical housing construction; pada a baklayen laeng ti developer iti land acquisition ken
development ken housing building construction; wenno mangala ti developer iti maysa a third party tapno pondoan iti proyekto.

“Ti akem ti gobierno ket mangted kadagiti puntiria a benepisario ken mangirekomenda kadagiti kualipikado a benepisario, nga agbalinto a pagbatayan ti developer iti bilang ti housing units,” kinunana. Ti probinsia ket addaan ti agarup 170,000 housing unit backlogs ngem damo a puntiria ti probinsial a gobierno a mangibangon iti 50,000, innayonna.

(HA-PNA Ilocos/PMCJr.-ABN)