7 NGA LGU TI PANGASINAN IMPASIDONG TI COMELEC ITI YELLOW CATEGORY

January 11, 2025 Headlines

MALASIQUI, Pangasinan

Inkabil ti Commission on Elections (Comelec) ti pito a lokalidad ditoy probinsia ti Pangasinan iti sidong ti yellow category a maitunos iti May 2025 midterm polls. Dagitoy dagiti siudad ti Dagupan ken Urdaneta, ken dagiti ili ti Aguilar, Binmaley, Malasiqui, Mangaldan, ken Sual. Segun iti Comelec, dagitoy a lugar ket addaan iti maysa kadagiti lima a pagrukodan ti yellow category nga isu ti pannakapasamak ti masuspetsa nga election-related incident (ERI) iti napalabas a dua nga eleksion basta awan ti pannakipaset dagiti domestic terror groups, kaadda ti nakaro a partisan political rivalry nga awan ti pannakipaset dagiti domestic terror groups, posible a panangipatrabaho kadagiti pribado nga armado a grupo (PAG) wenno potensial a PAG dagiti kandidato iti lugar, panagpasamak ti politically
motivated ERI iti agdama a panawen ti eleksion basta awan ti pannakipaset dagiti domestic terror groups, ken ti lugar ket dati a naideklara iti sidong ti kontrol ti Comelec.

Iti interbiu ti telepono, imbaga ni Comelec provincial election supervisor lawyer Ericson Oganiza, a ti categorization ket inkeddeng laeng ti central office ken saan a naibasar iti rekomendasion ti provincial elections office. “Dagitoy ket lugar a pakaseknan, a bantayan ti polis. Kaaduan kadagitoy a lokalidad ket awan ti grupo dagiti terorista wenno rebelde. Ti opisina sentral ket nangibasar ti panagkategoria iti pakasaritaan dagitoy a lugar iti dua a napalabas nga eleksion, ngem dina kayat a sawen nga adda riribuk kadagitoy a lugar,” kinunana iti Filipino. Impasigurado ni Oganiza a saan a maapektaran ti categorization iti kasasaad ti talna ken urnos iti probinsia. “Awan ti kinaranggas iti
kaaduan kadagitoy a lugar,” kinunana. Iti sidong ti color-coding scheme ti Comelec, ti code green ket kayatna a sawen nga awan ti problema ken pakaigapuan ti pannakaseknan; code yellow no addaan iti pakasaritaan ti
napolitikaan a riribuk, ti code orange ipamatmatna ti kaadda dagiti armado a grupo, ken code red para kadagidiay maibilang a kritikal a lugar.

(HA-PNA/PMCJr.-ABN)