9 opisial ti Taebaek City, simmarungkar iti Bauang

Headlines

BAUANG, LA UNION – Sinangaili ti lokal a gobierno ti Bauang dagiti opisial ti Taebaek City iti Gangwondo, South Korea nga immay simmarungkar tapno mapatibker pay ti pannakigayyemda iti munisipio a narugian idi 2013.

Simmampet dagiti delegado ti Taebaek nga idadauloan ni Vice Mayor Il-Jae ken walo nga city councilors idi Pebrero 25. Naikkan dagitoy ti simple a welcome dinner iti White House Beach Resort iti panangidaulo ni Mayor Eulogio Clarence Martin P. de Guzman III.

Dagiti nasao a delegado ket immuna a nakipaset iti Panagbenga Festival kas maysa a sisterhood city ti Baguio sakbay nga immayda iti Bauang.

“Bauang will be your second home, you are always welcome to visit our humble town. I hope that our friendship will extend beyond our official relationship,” nakuna ni Mayor De Guzman iti panangsarabona kadagiti opisial ti Taebaek.

Nakipaset met iti welcome dinner dagiti dadduma pay a lokal nga opisial ti Bauang a pakaibilanganda Vice Mayor Bonifacio G.Malinao, SBM Alexander Romeo Obong, Warlito Daus, Gabriel Sotto, Danilo Abuan, George Picardal, ABC President Wowie Gallardo ken Bauang Tourism Council (BTC) President Dr.Peter Nang, malaksid pay kadagiti department heads ti local government unit.

Nalinglingay dagiti bisita iti musika ti Bauang Baggak Band ken Dra. Menchie L. De Guzman, asawa ti mayor, nga agtamtambor kabayatan ti panagkantana kadagiti kaudian nga Filipino hit songs.

Nagsinnukat met ti tokens ti Bauang ken Taebaek kas simbolo ti napaut a panaggayyem ken panagsinnaranay iti maysa ken maysa. BAUANG PIO / ABN