96% TI ILOCOS GRADE 3 NGA LITERACY PROGRAM NAKAPASA ITI READING TEST

June 21, 2025 Headlines

LINGAYEN, Pangasinan

Siam a pulo ket innem a porsiento kadagiti agarup 3,000 nga agad-adal iti Grade 3 iti Ilocos Region a nakiraman iti Literacy Remediation Program (LRP) ti Department of Education (DepEd) ti nakapasa iti reading assessment, kinumpirma ti regional official ti departamento
idi Huebes. Iti maysa a forum, kinuna ni DepEd Ilocos Region Director Tolentino Aquino, a dagiti agad-adal ket nailasin a kas “low emerging readers” gapu ta marigatanda nga agbasa ken mangtarus.

Dagitoy nga agad-adal ket nagdalan iti uppat a lawas a remedial class iti sidong ti LRP, nga inrugi ti departamento iti intero a pagilian ita a tawen. “Kalpasan ti uppat a lawas bayat ti summer break, 96 a porsiento kadagiti agad-adal ti nangipakita iti panagrang-ay ken nakapasa iti reading assessment. Nakasaganadan itan nga umakar iti sumaruno a grade level,” kinuna ni Aquino iti Filipino. “Ti nabati nga 4 a porsiento a saan a nakapasa ket maitantandudo latta ngem agtultuloyto nga umawat kadagiti espesial a tutorial manipud kadagiti
mannursuroda.” Kinunana a ti programa ket naipamaysa kadagiti grade 3 nga agad-adal ta daytoy a grado ket maibilang a kritikal a
tukad iti panagsursuro.

Nupay dagidiay addaan iti rigat irepresentarda laeng ti bassit a paset ti 1.2 milion nga enrollees ti rehion iti SY 2024- 2025, impaganetget ni Aquino, “polisiya ti DepEd nga awan nga ubing a nabati. Uray maysa a marigrigat nga agad-adal ket maikari iti tulong”. Ti LRP ket maysa kadagiti sumagmamano a 2025 Summer Programs iti sidong ti Deped, agraman ti Bawat Bata Makababasa Program, Summer
Academic Remedial Program, Regional Remediation Program, ken Learning Camp. Dagitoy nga aramid ket paset ti direktiba ni Presidente Ferdinand R. Marcos Jr. tapno mapasayaat ti kalidad ti edukasion ken pagimbagan dagiti mannursuro.

Iti maysa a pagsasao, kinuna ni Education Secretary Sonny Angara a dagiti summer program ket “nadisenioda a mangipaay iti kasapulan a
suporta ken rekurso tapno matulongan dagiti agad-adal a mangsango kadagiti karit ken mangragpat iti naan-anay a potensialda.”
Innayonna a dagitoy a programa ket maaramid babaen kadagiti interactive tutorials ken targeted activities, a mangipamaysa iti “phonics, fluency, vocabulary, ken comprehension” para iti panagbasa; ken “number sense, basic operations, ken problem-solving” para iti matematika.

Inulit pay ni Angara a dagiti mannursuro a makipaspaset kadagiti 2025 Summer Program ket maipaayan kadagiti vacation service credits (VSC) ken propesional a pannakabigbig iti rabaw ti 30 nga aldaw a maximum service credits para kadagiti mannursuro. “Mabigbigmi a dagiti mannursurotayo ket adda iti puso panagsubli ti panagadal. Dagitoy nga insentibo ket maysa a wagas tapno maipateg ti dedikasion ken kinalaingda, partikular bayat ti summer break,” kinunana.

(HA-PNA Ilocos/PMCJr.-ABN)