ABRA POLICE KIDDAWNA ITI PANAGTITINNULONG ITI BAET TI PAMMAPATAY’

March 29, 2025 Headlines

BANGUED, Abra

Agkiddaw dagiti police ti Abra iti suporta ken panagtitinnulong manipud iti komunidad iti baet ti nabiit pay a pammapatay iti probinsia iti
naudi a panawen. Manipud laeng idi Pebrero 28, 2025 agingga iti Marso 26, 2025, adda di kumurang a walo a biktima ti pammapatay,
kaaduan kadagiti biktima a konektado kadagiti politiko-kandidato kadagiti gobierno ti munisipio ken probinsia. Dagiti kaudian a natay ket
maysa a mannursuro ken maysa a dentista a pinaltogan ti maysa a nabigbig a mannanakaw iti naladaw a malem ti Mierkoles idiay Bangued, ti kabesera ti probinsia.

Madama ti panagregget, inkari ti Abra Provincial Police, bayat a dinakamatna a kadua dagiti dadduma nga ahensia ti gobierno, maar-aramid dagiti addang tapno marisut dagiti pammapatay ken dagiti nainaig iti paltog nga iraraut ken tapno madusa dagiti nagaramid iti
daytoy. Inyunay-unay ni Abra Police Provincial Director Col. Gilbert Fati-Ig a naikumitda a mangtaginayon iti talna ken urnos iti probinsia. “…ket nasken ti suporta ken kooperasyon yo iti daytoy nga ganwat,” inkari ti Abra police provincial command.

Indagadagna pay kadagiti umili nga ireport wenno ipaayda ti aniaman nga impormasion a mabalin a mangiturong iti pannakailasin dagiti suspek agraman dagiti mastermind iti likudan dagitoy nga atake ken pammapatay. Kabayatanna, ni Acting Abra Governor Russel Bragas
ket nangipakaasi kadagiti Abrenians a “pilienda iti kappia ken saan a matnag a biktima kadagiti maniobra ken manipulasion”. Indagadagna kadagiti tattao nga agkaykaysada a mangkondenar iti amin nga aramid ti kinaranggas bayat nga agtalinaedda a naridam.

“Napeggad ngem no ti mismo a masakbayantayo ket nakataya, saan kadi a maitutop dayta a peggad? No saan a sika ken siak, siasino? No saan nga ita, kaano?” Inyunay-unay ti opisial. Kinuna ni Bragas a dagitoy man ket mainaig iti eleksion wenno saan, dagiti takrot nga aramid ti kinaranggas ket awan ti lugarda iti maipagarup a sibilisado a kagimongan. Inyunay-unayna nga agpapada laeng amin dagitoy. “Dadaelenda dagiti arapaap, oportunidad ken namnama para iti nasaysayaat a biag iti masakbayan wenno para iti nasaysayaat a lugar a
pagnaedan,” intuloyna.

Indagadag met ti acting governor kadagiti tattao nga ipakitada ti pannakipagrikna iti tunggal maysa ken siaannad a makitinnulongda kadagiti autoridad. Inawagan na pay ti PNP ken dadduma pay nga ahensia ti pannakaipatungpal ti linteg ken instrumentalidad nga
agpanunotda a naimbag, ngem determinado ken di agsarday a mangsurot saan laeng a kadagiti nangaramid no di ket dagiti personalidad iti likudan ti tunggal maysa kadagiti inladawanna a kas narungsot. “…No maipalubos, iti naan-anay a puersa ti linteg,” innayonna.

(AD/PMCJr.-ABN)