Ama, pakawanem ida ta saanda nga ammo ti ar-aramidenda

April 8, 2017 Opinion Sirmata ken Tagtagainep ni Mang Gusting

“Ama, pakawanem ida ta saanda nga ammo ti ar-aramidenda.” Maysa kadagiti balikas ni Hesu Kristo idi a nakalansa iti krus iti bantay kalbaryo. Asino kadatayo ti makaammo kadagitoy a balikas ti Mannubbot tayo? Mano kadatayo ti nagbabawi kadagiti nakabasolanna?

Lawas ti ngilin, Semana Santa wenno nangina nga aldaw kas kuna dagiti nagkauna a kaputotan tayo. No diak mariro, tunggal madanun daytoy nga aldaw wenno tiempo maurnong kami amin iti balay ket siuulimek kami. Maiparit ti agtrabaho, aglaaw ken maiparit ti agsida iti karne. Sumagmamano laeng dagitoy kayong nga intay nariingan a kaugalian da Apong Baket ken Apong Lakay kas met laengen kadagiti nagannak kadatayo. No maipigsam laeng ti agsao, kusilapandakan.

Agdengngeg iti radio kadagiti programa nga adda pakainaiganna iti Apo kas koma kadagiti pasyon a kunada. Nakailad ka laeng, mangan agidda, mapan agiwayway, agpainum kadagiti nuang wenno agpakan iti baboy. Dagita laeng ti maaramid idi. Ta dagiti kasapulan iti makalawas, maisaganan. Maiparit ti mapan agpukan-pukan dita, isu a sakbay daytoy a lawas naisagana aminen a kasapulan.

Ngem daytoy ti saludsod, Kayong Angkuan, ania dagiti inka mapalpaliiw itan? Manmanon a makuna dagiti sipapasnek a mang-ngilin iti daytoy a tiempo. Panagkunak kayong ket mano laengen a porsiento, no adda man, tay kunadan a pasa komplimento. Ta kas intay maobserba, no kastoy a tiempo nga isu ti makuna a bakasyon, adu dagiti agawid kadagiti ili wenno probinsiada manipud siudad tapno agbakasion ket ditoyen, Kayong Angkuan. Ditoyen ti pakakitaam a gundawayanda met ti aglang-ay a kunada, videoke ditoy videoke idiay, bartek ditoy bartek idiay. Diosko, pakawanem ida ta saanda nga ammo ti ar-aramiden da. Puera delos buenos a kunada ngem dayta ti kaaduan nga inkam napalpaliiw tunggal ngilin wenno Semana Santa.

Iti sabali met a bangir, nagduduma ti wagas ti panagngilin ta, ti ngamin gapuna Kayong, nagduduma metten ti pammati tayo. Adun dagiti timpuar wenno nabuangay a pammati, isu a saanen a kas idi a dua wenno tallo agingga iti uppat lima laeng dagiti makuna a pammati wenno sekta. Saan a kas ita a saanen a mabilang kadagiti ramay ti ima ken saka iti kaaduna. Kayatna a sawen, kaaduan kadagiti kakabsat a Katoliko ken Protestante ken daddduma pay ti simiasin ket nangbangonda iti sabali a pammati wenno relihyion da. Apay ngata a kasta, Kayong, ania ti kangrunaan a rason? Ammo ken mamati kami nga adda kabukbukodanda a rason no apay, mabalin a saandan a kuntento iti panangipataray dagiti makuna nga opisyal wenno mangimaton kadagitoy iti kapilyada. Adu a rason, Kayong. Kayatna a sawen, Kayong talaga a nasitak-sitaken ti sigud a naurnos a timpuyog tayo no maipapan iti pammati iti Apo a Namarsua iti langit ken daga ken aminen a makita ken saan a makita. Isu a saan laeng a mayaplikar ti sinao ni Kristo Hesus iti krus ngem ketdi, mayaplikar iti uray ania a panawen. Wen, Ama, pakawanem ida ta saanda nga ammo ti ar-aramidenda. Ken agpapan kadagiti opisyal a mangituray kadatayo, adu ti saanda nga ammo ti ar-aramidenda. Kurakot ditoy, kurakot idiay isu a ti rumbeng a maikararag kadakuada ket “Ama, pakawanem ida ta saanda nga ammo ti ar-aramidenda.”

Opssss, kayong Angkuan, delikadon…nalabsak man ti nagis-istoryan ket naglabes manen ti orasko. Dakesen, agawidak pay, narigaten no umaynak manen suroten iti binalsig ni Sofing ta mapan kami pay gayam dumngeg iti siete palabras ita. Babayo, tsuptsup muahmuah.