Barangay election – Part 2

April 28, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy kulom tayo. Kumusta, mag-an kayo amin nga awan labasna.

Ngem sakbayna, kakayong, adtoy man pay ti ababa nga inkam pangray-aw kadakayo tapno makerrasan ti dudukot tayo a kunada. Nagtagtagainep ni Mang Gusting ket kampay idi nagsarakda ken Atong iti tersina ni Ikit Huana ket adda naistorya ni Atong a nakakigtotan ni Mang Gusting—ket

Atong: Ammoyo, Mang Gusting, inaldaw nga ibagada idiay balaymi a sadutak…
Gusting: Aya!
Atong: Isu nga inaldaw met a planok ti pumanaw, ngem saan matultuloy.
Gusting: Apay a di matultuloy, Atong?
Atong: Masadutak!
Gusting: Ngeeeee!

Wahahahaahhahaa.

Bueno kakayong, kailian, agkatawa dagiti mayat, ah. Opsss, dikay agmurareg ah, dakes ti kanayon a nakasiddunget. Kunada ngarud laughter is the best medicine. Isu nga agkatawa wenno umisem kayo nga uray agsasamusam dagiti intay paspasaren a parikut. Kitaem ni Pare Jun ket tunggal agkita kami manglapayag ti isemna, kasta ah! Tapno maksayan ti uged iti mugging! Saan a bale nga awanen buokna hahaha!

Mayo 4, mangrugin ti panagkakampanya nga aggibus inton Mayo 12. Kas mapalpaliiwmi kabarangayan mi ida, uray ita pa laeng, addan dagiti mangikurkurimed nga agkampania. Nagsimple a linteg wenno alagaden a di pay mabalin ti agkampania, dida pay masurot wenno matungpal, kasanu nga agbalin a lider wenno opisyal ti kasta? Adda pay dagiti madamdamagmi ditan a mangdadael iti padana a kandidato. Ibagana nga immutang ni kastoy wenno kasdiay a pulano a kandidato kenkuana a pagpaaramidna iti polietos ken tarpaulin na ngem saan met gayam. Sus Maria kusina, ania ket dagiti ulboden aya, addaka dita nga iwarwarasna a ni pulano wenno pulana ket saanen a nagkandidato idinto ta nakaun-unansa pay kenkuana a nagipila. Nagadu la ketdin a salawasaw a tao ditoy rabaw ti daga.

Talaga kadi a kastoy to taray ti pulitika? Adda diay am-ammok, sigud nga agkaduada isu pay kanu ti nangtulong kenkuana iti napalabas a barangay election tapno mangabak ngem apay itan a naglabanda metten iti kinakapitan? Sus maria kusina, kitaen yo, kabarangayan…saan kayo koman nga agbiddut, ibotosyo koma dagiti namnamaenyo a nakasagana nga agserbi ken napudno iti takemda, saan a barengbareng ta datayonto met laeng ti agsagaba manen iti manu a tawen. Saan koma a pagibasaran ti kina-kumare wenno kumpare yo ngem ketdi, arisitenyo a nasayaat ti kabaelan ken kinatao ti inkay ibotos.

Maysa pay nga inkam koma igunamgunam kadagiti kabarangayan, Kayong, ket isu koma ti nadalus ken natalna nga eleksyon. Awan koma ti madamag tayo a matay wenno madangran gapu laeng iti eleksyon ti barangay. Kasta met nga awan koma ti dinnadael ta agsasarak kayto met laeng kalpasan ti eleksyon ta agkakabarangay kayo la ket ngarud. Agbalintayo koma a natakneng ket ited tayo met kadagiti kabarangayan tayo ti gundaway a mangpili no asino a talaga ti namnamaenda a makaitakder kadakuada iti konseho de barangay. Adda met kanu dagiti lugar a nasumokda metten ti aggatang iti botos sus maria kusina. Barangay laeng addan kakastoy nga aramid? Naragsakka kadi a mangabak weno agtugaw kas kagawad wenno kapitan a ginatang met la gayam ti botosmo a saan a sika ti talaga a kayat dagiti kabarangayam? Ania ti biag a talaga, sal-ot ketdi dagiti kakastoy ti panagut-utekna. Ken maudi, awan koma ti dinnadael iti tarpaulin kalpasana, ipabasolmo met laeng iti akin-tarpaulin tapno mapabasol ti kalaban, sus ania la ketdin, ulaw ngarud met diay tao a dadaelenna ti bukodna a tarpaulin!

Ala ngaruden, kasta pay kakayong ta ne, overtime tayo manen, kasta pay ket ne nakaadu tayo manen. Babayoo, tsup tsup muahmuah.