Baro nga by-pass road sadiay Pangasinan linuktan ti DPWH

January 24, 2021 Headlines

SIUDAD TI URDANETA, Pangasinan – Maysa a 7.17 kilometro nga bypass road ditoy a siudad nga mangpababa iti oras ti panagbiahe agingga kagudua ken mabenipisiaran iti rinibo a motorista iti nakalukaten ita idiay Pangasinan.
Indanguluan ni Secretary Mark Villar iti Department of Public Works and Highways iti ceremonial drive-thru iti PhP1.8 bilion, six-lane a by-pass road idi Lunes nga mangrugi iti pagsabtan (junction) ti Manila North Road idiay Barangay Nancayasan ken dumalan agpalaud nga agpatingga idiay Barangay Anonas.
Kinuna ni Secretary Villar nga iti by-pass road ket paset iti Build, Build, Build a programa ti administrasion Duterte nga panggep na nga mapabassit iti nailet a trapiko ken mapababa iti oras ti panagbiahe nga mabenepisiaran iti ad-adu a tattao.
“The Build, Build Build program will deliver more projects. Magkakaroon tayo ng expressway network. It is the vision of President Rodrigo Roa Duterte to connect the entire Luzon from north to south.” Kuna iti Secretario. Kinunana nga segseggaan iti departamento nga aglayon iti by-pass road kadagiti ili ti Binalonan ken Villasis ken pannakaaramid iti ad-adu pay a diversion roads iti amin a munisipalidad ti probinsia.
Iti Rehion 1, impaganetget ni Sec. Villar iti pannakaaramid ti San Fernando City by-pass road iti probinsia ti La Union nga mapapartak iti panagbiahe kadagiti probinsia ti Ilocos. Dinayaw na met iti pannakairingpas iti Rosario, La Union a paset ti Tarlas-Pangasinan-La Union Expressway (TPLEX) nga nainagurasionan iti nabiit.
“For the economy, marami ang nawawala at nasasayang kapag matindi ang traffic, so with these by-pass roads, pwedeng-pwede na ang through-and-through,” impalawag ni Villar. Kabayatanna, kinuna ni Fifth District Representative Ramon Guico III nga iti by-pass road ti distritona ket maysa a dakkel a tulong gapu na iti kinaadu ti trapiko sadiay Urdaneta City nga isu’t gapuna ti napartak a panagprogeso ti ili.
“The creation of new networks will create new opportunities for development,” kuna ni Guico iti maysa nga interview. Kadua ni Sec. Villar da 5th District Rep. Ramon Guico III, 6th district Rep. Tyrone Agabas, Board Member Chinky Tababan nga pannakabagi ni Gov. Amado Espino III, Mayor Julio Parayno ti Urdaneta City ken Ilocos DPWH Regional Director Ronnel Tan.
(VHS- PIA Pang./PMCJr.-ABN)