Beterinario ti LU nakabalan ti umno a panangtaming iti rabies

May 27, 2019 Provincial

LA UNION – Tapno adadda nga makabalan iti umno a panangtaming iti kaskaso ti rabies iti probinsia ti La Union ket timmabuno da Dr. Santa Fe L. Palpal, Dr. Raquel P. Difontorum ken Dr. Romuelda C. Mangaser iti Office of the Provincial Veterinarian iti maysa a panagsanay ti Animal Rabies Detection sadiay Regional Animal Disease Diagnostic Laboratory (RADDL), Tebag East, Sta. Barbara, Pangasinan idi May 6- 10, 2019.
Nakabalan ti panagsanay dagiti nakipaset iti paglaingan ti pangikondukta iti Direct Fluorescent Antibody Test (DFAT). Iti DFAT ket mausar tapno sukimaten ti kaadda dagiti rabies virus antigens iti brain tissues dagiti ayup. Iti nasao nga panagsanay ket
mairaman met iti maysa nga hands-on training ti microscopic detection iti nasao nga virus.
Timmabuno iti nasao nga panagsanay dagiti tallo nga beterinario a kas panagsagana iti panaglukat ti La Union Provincial Rabies Diagnostic Laboratory nga maipasidong iti Office of the Provincial Veterinarian.
Daytoy ket mangwanwan iti estado dagiti kaskaso iti rabies iti probinsia ken mangpabassit iti rigat ket gastos dagiti tao nga mangipan kadagiti natay nga ayup wenno ulo daytoy iti RADDL sadiay Pangasinan ken Cordillera.
Iti rabies ket maysa nga sakit a maigapu iti virus babaen iti katay iti maysa nga naakaran nga ayup. Arapaap iti Department of Health nga ideklara ti Pilipinas a kas Rabies Free inton tawen 2022.
Isu nga, iti panaglukat iti La Union Provincial Rabies Diagnostic Laboratory ket dakkel a tulong tapno magun-od iti arapaap iti probinsia.
MPIU/PMCJr/ABN