Bisyo ditoy, bisyo idiay

June 11, 2017 Opinion Sirmata ken Tagtagainep ni Mang Gusting

Naimbag nga orasyo amin papagayam ken sukimi a readers ti ABN, ania ngay ti madamag ita kadagiti batug yo a langit este kadagiti pagnanaedan yo? Naimbag laeng no saan kayo nga apektado kadagiti mapaspasamak ita ditoy lubong, kadagiti nagduduma nga isyu ken paspasamak iti aglawlaw tayo? No dakami ti kas yo damagen, sus Apo aya Kayong Angkuan, saanmi nga ammo no ania itan dagitoy a mapaspasamak. Nakirun ti lubong, aminsan a paset ti lubong ket adda riribuk. Kas pagarigan laengen idiay Mindanao partikular idiay Marawi City, nagdakkel a parikut ti panangsakup dagiti maatap a rebelde wenno ti kunada a Maute Group. Adu dagiti civilian wenno inosente nga umili ti nagbalin a biktima nangruna kadagiti saan a basta nakapanaw iti nasao a lugar idi sakupen dagiti armado a rebelde. Bayat a masursurat daytoy a kolum ta Kayong Angkuan, addan ti damag nga iti las-ud ti uppat nga aldaw, maparmek ken makontrol da dagiti nasao a grupo. Ti laeng makunami,sus maria kusina, nagbassit a grupo, dimmanun pay laeng kastoy kabayag ken kaadu dagiti naperhuisio ken nadadael.

Kuna ngarud dagiti managpaliiw Kayong Angkuan, nagbassit a grupo didansa pay kabaelan a rebbeken, lalu la ketdin no nagdakkel a pagilian kas China ti mangpanggep a mangsakup kadatayo? Sus Ina aya, awanen a, maysa laeng nga aldaw, amangan no nasakupdatayon ket addatayon iti babaen ti asino ditan a pagilian a mangsakup kadatayo. Sus Apo, saan koma a mapasamak dayta, yad-adayom Apo… saanmo koma nga ipalubos a mapasamak ti kasta kadakami.

Iti naglabas nga aldaw, adu dagiti saan a makaparagsak a damag, Kayong, kas koma laengen ti napasamak iti maysa a casino iti Metro Manila, adu ti natay iti daydiay nga insidente gapu laerng iti maysa a lalaki a nagpagunggan. Adu to nagatap kadagiti kauna a guest ti nasao a casino ngem saan a babaen iti balay ngem ketdi iti uram, nagpaputok ti nasao a suspect ket nag-panic dagiti bisita wenno dagiti adda iti casino ta ipagarupda a sinerrek dagiti rebelde a kameng ti Maute wenno dagiti ISIS nga ibagbagada. Nagtatarayda, ngem no ania ti nagtutuon iti ulo ti maysa a tao ket nagparnuay iti apoy, ditoy ti nakatayan dagiti daddduma gapu iti asuk.

Adu ti mangipagarup a rebelde wenno bulos dagiti rebelde a grupo ti nasao a lalaki ngem, saan a patien dagiti awtoridad. Intultuloy ngarud ti awtoridad ti nagimbistigar agingga iti natiliwda ti suspect a no sadino ket casino chips kano laeng ti rantana. Ngem, ania ti makagapu? Segun iti initial nga imbistigasyon ket nabisyo daytoy a tao. Dakkel ti utangna gapu iti panagkas-casino na ken maysa gayam a bulangero. Sus, Kayong, saanmo a padasen ti agbisyo ta awan nasayaat a pagbambanagan ti biagmo.

Wen, kayong Angkuan, dayta ti nagbalin a resulta ti imbistigasyon. Ngem kuna met dagiti gagayyem kanu ti natiliw a suspect, nasingpet kano met daytoy…ngem, ania ngarud ti pudno ita, nasingpet wenno nabisyo a talaga ket casino pay ken bulang wenno pallot ti bisyona. Kasanon no ABS a kunada, ammom ti ABS Kayong Angkuan? Alak-Babai-Sugal ti kayat a sawen dayta kayong. Isu a no agkamkamtud ka met laeng iti kuarta saankan nga agbis-bisio, kasta ti kapintasan a maaramidam.

Na, ah sus Kayong, naglabesta manen iti oras nga inta pannaki-is-istorya. Masapul nga umawidakon ta narigaten no umaydata kamaten iti binalsig. Ala, kastan…bindisyon koma ti Dios a namarsua ti agbati kadakayo amin nga awan labasna. Tsup tsup, muahmuah.