BLOKE TI SHABU NGA AGGATAD TI PHP117-M NAALA MANEN ITI BAYBAY TI ILOCOS SUR

June 28, 2024 Headlines

SIUDAD TI LAOAG

Nasurok a 18 a kilo ti shabu a napattapatta nga aggatad iti PhP117 million ket nasarakan a tumtumpaw iti baybay ti Sta. maria, Ilocos Sur agsapa ti Mierkoles (Hunio 26), dua nga aldaw kalpasan a nasarakan dagiti umasping a banag iti sabal inga ili. Sigun iti police report, maysa a mangngalap iti nakasarak kadagiti banag bayat nga adda daytoy iti bayabay, 16.1 nautical miles iti laud ti Sta. Maria. Iti sango ti publiko kas saksi, maysa a forensic examination iti Ilocos Sur Police Provincial Forensic Unit iti naaramid, no sadino innem a pakete iti naala para iti random sampling.

Nagpositibo iti resulta. Idi Lunes (Hunio 24), dagiti mangngalap manipud San Juan, Ilocos Sur, agarup 58 kilometro ti kaadayona manipud Sta. Maria, iti nakasarak kadagiti tumtumpaw nga iligal a droga, a kinuna dagiti autoridad nga agarup 23.9 kilos ti kadagsenna ken addaan napattapatta a gatad a PhP157 million. Iti maysa a media interview, imbaga ni Ilocos Sur Police Provincial Office director PCol. Darnell Dulnuan a maysa nga naan-anay a panangsukimat iti maar-aramid tapno maammuan ti nagtaudan ti kontrabando. Dagiti banag a naala dagiti mangngalap ti Ilocos Sur iti agpada nga insidente ket agparang nga addaan kadagiti umasping a marka ti Tsino, kuna dagiti autoridad.

“Daytoy a napartak a tignay ipakitana ti dedikasiontayo a manglaban iti panaglako ti iligal a droga ken panangsigurado ti kinatalged ti publiko iti probinsia,” kuna ni Dulnuan iti maysa a pagsasao a publiko. Iti kaudian a natakuatan nga iligal a kontrabando iti baybay ti Ilocos, inrekomenda ti Philippine Drug Enforcement Agency (PDEA) iti panangkondukta ti panagsanay kadagiti mangngalap ken agindeg kadagiti komunidad ti igid ti baybay nga agserbi kas kanayonan a “force multipliers” iti panagkalap ti impormasion. “Iti panangted kapasidad kadagiti mangngalap tayo ken agindeg kadagiti igid ti baybay a munisipalidad ket napateg iti panangpasayaat ti operasiontayo,” kinunani PDEA-Ilocos Norte provincial officer Richard Tinong.

Dinakamat na pay iti pakasapulan ti agtultuloy a koordinasion ket pannakipaset dagiti amin a maseknan nga
institusion ti gobierno iti kampania kontra droga. Kabayatanna, imbaga ni Police Regional Office (PRO) 1 chief Brig. Gen. Lou Evangelista a dagiti naala nga iligal a droga manipud dandanum ti probinsia ti IIocos Sur ket nalabit a maysa laeng a paset iti dakdakkel a kargamento ti droga. Iti maysa nga interbiu ti telepono, kinuna ni Evangelista
a binilinna dagiti local police units a mangipasdek kadagiti checkpoint tapno masabat dagiti trafficker a mangpadas a mangibiahe kadagiti droga babaen ti daga.

“Daytoy ti umuna a gundaway a nakaipasanguanmi iti kasta a pasamak. Isu a pinapigsami met dagiti operasionmi iti igid ti baybay,” kinunana. Innayon ni Evangelista a kitkitaenda met no iti pasamak ket kapada iti nadakuatan a droga idiay Alitagtag, Batangas no sadino a maysa nga yate iti maipagarup a mausar a pagibiahe iti kontrabando iti dandanum ti probinsia. Kinunana nga iti panangpadas a panangbiahe ti kontrabando ket mabalin a nalapdan ti dakes a panawen. “Gapu siguro iti tudo, bayakabak isunga saanda a nasayaat a naigalut. Siempre napigsa dagiti dalluyon no agtudtudo. Nalabit kasta ti naapsamak,” innayon ni Evangelista.

(LA-PNA Ilocos/PMCJr.-ABN)