CHILD STUNTING RATE ITI ILOCOS NABABBABA NGEM NATIONAL AVERAGE

May 3, 2025 Headlines

SIUDAD TI SAN FERNANDO, La Union

Bayat a ti Pilipinas ket maipaspasango iti stunting rate (pannakatiltil) a 26.7 porsiento kadagiti ubbing nga awan pay lima ti tawenda, ti Rehion 1 ket agtultuloy a mangipakita iti panagrang-ay iti panangkissay iti malnutrision dagiti ubbing babaen iti nainget a panangikagumaan dagiti umili iti nutrision. Kas pagarigan, iti Ilocos Norte, bimmaba ti panagsaknap ti pannakatiltil manipud 8.9 a
porsiento idi 2019 agingga iti 4.3 a porsiento idi 2023, sigun iti Provincial Nutrition Action Office.

Tapno masustiner dagitoy a ganansia, inurnong ti National Nutrition Council (NNC) Region 1 dagiti mannursuro, dagiti child development workers, ken dagiti information officers para iti maysa a Virtual Regional Nutrition Forum idi Abri; 25. Panggep ti forum a
papigsaen ti lokal a panagitandudo iti sidong ti Philippine Plan of Action for Nutrition (PPAN) 2023-2028. Inyunay-unay ni Kendall Pilgrim A. Gatan, officer-in-charge ken nutrition program coordinator ti NNC-1 a ti panangrisut iti malnutrision ket kasapulan ti panangpasayaat iti pannakaammo ken panagbalbaliw ti ugali iti lebelo ti komunidad.

“Maysa kadagiti estratehia nga ar-aramidenmi ket ti panangitandudo iti lokal a panagbalbaliw ti kababalin, gapu ta ti parikut ket agtaud iti kinakurang ti pannakaammo maipapan iti nutrision,” kinuna ni Gatan. Nasanay dagiti nakipaset kadagiti praktikal nga alikamen a kas iti “10 Kumainments,” “Pinggang Pinoy,” ken iti First 1,000 Days Program a mangitandudo kadagiti makapasalun-at nga aramid iti
pannangan kadagiti pamilia, estudiante, ken trabahador. Nangawag ni Tolentino G. Aquino, regional director ti Department of Education
(DepEd) 1 iti agtululoy a panagtignay tapno masalakniban dagiti ganansia ti Rehion 1, nangruna ta dagiti nasional a numero ket agtalinaed a makapadanag.

“Ipalgak ti report a ti Pilipinas ket addaan iti kangatuan a panagsaknap ti under-five stunting iti intero a sangalubongan a 26.7 porsiento
no idilig iti global rate a 22.3 porsiento,” kinuna ni Aquino. Impalagipna met kadagiti komunidad a ti nasayaat a nutrision ket saan a maipapan iti panaggatang kadagiti nangina wenno nalatak a taraon. “Masapul a malawlawagan a ti nasayaat a nutrision ket saan a nasken a maipada iti presio ti taraon, wenno dagiti nalatak a produkto ti taraon ket mabalain a saan a talaga a mangipaay kadagiti nasken a nutrisional nga elemento a mabalin a kasapulan ti maysa,” kinunana Babaen iti napabileg a panangitandudo, panggep ti NNC-1 ken dagiti kakaduana a salakniban ti progreso ti Rehion 1 ken makatulong iti nasional a kalat a panangikkat iti amin a kit ani malutrision inton 2028.

(AIHR/PIA Region 1/PMCJr.- ABN)