COA exec, sinuspinde dahil walang SALN

LA TRINIDAD, BENGUET – Dahil sa pagkabigong magpila ng kanyang Statement of Assets and Liabilities and Net Worth (SALN) ay isang auditor ng gobyerno sa Cordillera ang humarap sa administratibong kaso at nasuspinde ng tatlong buwan.
Sa anim na pahinang desisyon ni Graft Investigation and Prosecution Officer III Christine Carol A. Casela-Doctor at inaprubahan ni Deputy Ombudsman for Luzon Gerard Mosquera, ay nakitang nilabag ni Edna T. Tomelden, Director II ng Commission on Audit-Cordillera, ang mga probisyon ng batas.
Sinuspinde ito ng tatlong buwan nang walang aasahang sahod dahil sa paglabag sa Section 8 ng Republic Act 6713 (Code of Conduct and Ethical Standards of Public Officials and Employees) partikular ang submission ng SALN.
Sinabi ng Ombudsman na kung nagkataon na wala na sa serbisyo si Tomelden at hindi maipapatupad ang suspension ay pagmumultahin ito.
Kinasuhan ni Salvador Liked ng Mt. Province si Tomeldan noong Setyembre 21, 2015, matapos na malaman na nabigo itong magpasa ng kanyang SALN para sa mga taong 2004, 2007 at 2009.
Noong Pebrero 26, 2016, inutusan ng Ombudsman si Tomeldan na magpila ng counter-affidavit at ebidensya na nagsasaad kung bakit hindi ito dapat patawan ng parusa.
Sinabi ni Tomeldan noong Marso 15, 2016 na maingat niyang sinunod ang pagsusumite ng kanyang mga SALN. Aniya ay hindi rin siya nakatanggap ng anumang memorandum ng non-compliance kaugnay ng annual submission ng SALN.
Ngunit, ayon sa desisyon, kinakailangan na bawat empleyado at opisyal ng gobyerno ay magsumite ng kompletong paglalahad ng kanyang assets, liabilities at net worth upang hindi mapaghinalaan sa kwestyonableng pagkuha ng yaman.
Binanggit din sa desisyon na ayon sa officer-in-charge sa records section ng Ombudsman ay walang SALN si Tomeldan para sa taong 2004, 2007 at 2009 na ang ibig sabihin ay hindi ito nagsumite sa mga nabanggit na taon.
Dagdag pa sa desisyon, kung totoong nagsumite si Tomelden ng SALNs sa kanyang opisina ay dapat nakapaglabas na ito ng patunay. Ace Alegre / ABN

Amianan Balita Ngayon