CPA suportado ang pagsuspinde ng mga minahan sa Benguet

Maigting ang naging suporta ng Cordillera Peoples Alliance sa desisyon ni Department of Environment and Natural Resources Secretary Gina Lopez ukol sa pagsasarado ng 23 malalaking minahan dahil sa masamang dulot ng maling pagmimina.
Sa isinagawang press conference ng CPA kamakailan ay inihayag din ang pagnanais nilang ibasura ang Philippine Mining Act of 1995 na nagpalala sa panghihimasok ng mga foreign mining companies sa bansa.
Pinangunahan ni CPA deputy secretary general Santos Mero ang pagtalakay sa naturang batas. Aniya, ito ay nagsasaad ng maling patakaran na nagdudulot ng unti-unting pagkasira ng mga lupain at kayaman ng Pilipinas dahil sa mga malalaking kompanya ng minahan.
Kasama rin sa pagpupulong si Franklin Almoza, indigenous peoples mandatory representative ng Itogon, na tinalakay ang traditional mining na mabisang alternatibong paraan ng pagmimina. Si Jose Sapino, representative ng Pacda Neighborhood Organization sa Mankayan, Benguet, ang tumalakay sa epekto ng mga malalaking minahan sa kanilang pamumuhay at kabuhayaan.
Tinalakay naman ni Kilusang Mayo Uno-Cordillera Representative Vicente Dilem ang kalagayan ng mga kontraktuwal na manggagawa at mga paglabag ng ilan sa mga kompanya ng minahan.
Ayon sa datos ng DENR mula sa 41operating metallic mines sa bansa, 11 lamang ang nakasunod sa environmental standard. Nagbigay naman ng pagkakataon ang nasabing ahensya sa mga mining companies na ipaliwanag kung bakit hindi dapat masuspindi ang kanilang mga operasyon.
Samantala, 10 kompanya ang ipinasara habang 20 minahan naman ang nahaharap sa suspension na kinabibilangan ng Lepanto Consolidated Mining Co.; Benguet Corporation; at OceanaGold Phils. Inc. na maay mga operasyon sa Luzon.
Inirereklamo ng komunidad ng Itogon ang Lepanto Consolidated Mining Co. dahil sa mga operasyon at maling trato ng kompanya sa kanilang mga manggagawa.
Ayon kay Sapino, “Nagsimula noong 2015, dun na namin naramdaman yung sign ng underground blasting nila palapit nang palapit sa ibabaw malapit sa lugar namin, 2016 nagsimula nang mag-crack yung mga bahay, pati eskwelahan lumulubog na.”
Aniya, kinukulang na ang supply ng tubig sa kanilang lugar at yumayanig na rin ang lupa dahil sa ginagawang underground blasting ng kompanya.
“Nangangamba kami baka dumating yung araw na kung mangyayari man di namin alam kung saan at kaninong bahay ang lalamunin ng lupa,” dagdag ni Sapino.
Aniya nag-report na umano sila sa nasabing kompanya ngunit wala pa ring aksyon ang mga ito.
Samantala, isinusulong ng grupo na maisabatas ang Peoples Mining Bill na ngayon ay nasa konseho, ani Sapino.
Ang Peoples Mining Bill ay naglalayong protektahan ang karapatan ng mga minero at isalba ang likas na yaman ng bansa mula sa di makataong pamamaraan at pamamalakad ng mga malalaking kompanya ng minahan. Ma. Carmina Lipio, UB Intern / ABN

Amianan Balita Ngayon