DEPED ILOCOS: AWAN TI ;GHOST STUDENTS’ ITI SHS VOUCHER PROGRAM

February 22, 2025 Headlines

MALASIQUI, Pangasinan

Inlibak ti Department of Education (DepEd) Ilocos Regional Office dagiti alegasion a dagiti pondo ti publiko ket nausar babaen ti panagpalista kadagiti saan a rimsua wenno “ghost students” iti programa ti Alternative Learning System (ALS) babaen iti Senior High School (SHS) Voucher Program. Iti maysa a pagsasao a naipablaak iti opisial a panidna idi rabii ti Martes, inlaksid ni Deped Ilocos Director Tolentino Aquino dagiti pammabasol kas awan
nakaibatayanna, malisioso, ken pinarparbo, nga imbagana a nairantada a mangdiskredito iti departamento ken dagiti personnel-na.

“Dagitoy a naimbento a kinaulbod a naidetalye iti reklamo ket produkto ti imahinatibo ken di umiso a panunot ti nagreklamo, a nairanta a mangsapsapul a mangdadael, mangpabasol, ken mangrugit iti nasayaat a reputasion a nagun-odmi,” kinuna ni Aquino. Ti kontrobersia ket nagtaud manipud iti viral a video nga agsirsirkulo iti social
media, a mangibagbaga a binilbilion a pesos ti di umiso a nausar babaen kadagiti naallilaw nga ALS enrollments idiay Umingan ken Tayug, Pangasinan.

Ibagbaga ti video a nailista dagiti peke nga estudiante iti sidong ti programa ti SHS Voucher, a mangipalubos iti
sumagmamano nga opisial a mangiyalis iti pondo ti gobierno. Idi Martes, pinasingkedan ni Education Secretary Sonny Angara a ti DEPED ket nangirugi iti internal investigation kadagiti report a 12 a pribado nga eskuelaan iti siam a scholl division ti maipagarup ng illegal a nagunggonaan manipud iti voucher program.

Inawat ni Aquino ti imbestigasion ken impanamnamana iti publiko a pro-aktibo ti DepEd Ilocos a nangsalaknib iti programa ti Government Assistance and Subsidies (GAS) para kadagiti pribado nga eskuelaan. Impaganetgetna a dagiti regional ken division office ket kanayon a mangbanbantay kadagiti pagadalan nga umaw-awat iti tulong ti gobierno ken dagiti report maipapan kadagiti nagturpos iti ALS iti sidong ti programa ti SHS Voucher ket
naisubmitir iti Private Education Assistance Committee (PEAC) para iti panangtingiting. Iti laksid ti kontrobersia,
pinasingkedan manen ni Aquino ti panagkumit ti departamento iti kinalawag ken panagsungbat (transparency
and accountability), a nangisigurado a maitutop ken responsable ti pannakausar dagiti pondo ti publiko.

(HA-PNA Ilocos/PMCJr.-ABN)