DILG KINIDDAWNA MANEN KADAGITI KANDIDATO TI ABRA A MANGIKUMIT ITI PATAS, NATALGED NGA ELEKSION

April 12, 2025 Headlines

BAGUIO CITY

Inulit ti Department of the Interior and Local Government (DILG) ti panagayabna kadagiti lokal a kandidato idiay Abra ken ti intero a rehion tapno masigurado ti pannakagun-od ti patas ken natalged nga eleksion a nawaya dagiti botante a mangpili kadagiti kandidatoda.
Kinuna ni Araceli San Jose, DILG-Cordillera Administrative Region (CAR) Director, idi Huebes a, “Ti panagreggetmi iti gobierno ket rumbeng a makomplementaran babaen ti intero-a-kagimongan a pamayan. Masapul nga agtitinnulongtayo tapno maitandudo ti kinatarnaw ti eleksion ken ti kapatgan, taginayonentayo ti natalna nga aglawlaw para kadagiti botantetayo.”

Kinunana nga agtultuloy a suportaran ti DILG-CAR dagiti inisiatiba ken programa para iti pannakamantener ti kinatalged ken kappia ti publiko nangruna ta asidegen ti eleksion. Ti DILG ket addaan iti direkta a panangimaton iti Philippine National Police (PNP) a naikkan iti annong a mangipasigurado iti talna ken urnos kadagiti komunidad. Maipalagip a ti Police Regional Office (PRO)-CAR ket nangipatulod iti kanayonan a 100 a polis iti ABRA tapno makatulong a papigsaen dagiti checkpoint operations iti probinsia ken mangsigurado iti kinatalged ti publiko iti tengnga ti agsasaruno nga insidente ti panagpaltog.

Dagus met nga inikkat ti PRO-CAR ti provincial director babaen ti pananganamong ni Comelec gapu kadagiti di pay nasolbar a kaskaso ti pammaltog malaksid iti panagpabettak ti granada ken dagiti insidente ti panagibelleng. Kabayatanna, imbilin ni PRO-CAR Director Brig. Gen. David Peredo ti naing-inget a polie visibilty iti nadumaduma a paset ti probinsia tapno abetenna ti pannakaaramid dagiti krimen ken paupayanna ti panangawit kadagiti paltog iti ruar ti pagnanaedan. “Lumalakas ang loob ng mga tao kapag may hawak na baril kaya kailangan paikutin natin ang mga pulis para maagapan, makita kapag may mga kahina-hinalang nakasukbit sa katawan. Isa iyan sa mga nakikita natin na pwedeng solusyon sa mga shooting incident. Kapag nakakakita din ang mga tao na may mga pulis na nag-iikot sa
paligid, mas matatakot din ang kriminal na gumawa ng masama kaya hiniling ng regional peace and order council na tumulong ang mga LGU sa pag-provide ng gasoline para parating paikot ikot lang ang mga sasakyan natin,” kinuna ni Peredo iti pasasao a Tagalog.

(LA-PNA CAR/PMCJr.-ABN)