Geo hazard maps usaren para pananglapped ti didigra – MGB

July 20, 2019 Headlines

SIUDAD TI SAN FERNANDO – Impalagip ti Mines and Geo-Sciences Bureau iti Department of Environment and Natural Resources ti Ilocos Region (MGB-DENR-1) kadagiti local government units agingga barangay ken iti sapasap a publiko nga usaren iti geohazard maps nga immuna nga naaramid, pinabaro ken inwaras iti ahensia.

Iti nasao nga geo-hazard maps ket mangipaay iti 1:50000 ken 1:10000 scale dagiti munisipalidad agingga barangay ken sitios, zones ken purok nga masansan ken nalaka nga malayus ken panagreggaay.

Iti 1:10000 scale ket adadda nga umiso ken masinunuo no idilig iti 1:50000 scale. “Dagitoy nga mapa ket mangigiya kadagiti lokal a gobyerno tapno malappedan ken maep-ep iti pannakapukaw ti biag ken sanikua bayat iti dididgra,” kuna ni MGB-1 supervising geologist Vilma Vecino.

Innayon na nga, “dagiti mapa ket naibatay iti kakaruan a napasamak dagiti napalabas nga didigra nga nangdalapus iti lugar, nangusar iti nasientipikuan ken historikal a salaysay.”

Agtultuloy pay iti Vulnerability and Risk Assessment nga ar-aramiden iti MGB kadagiti identified critical areas nga 30 porsiento itan nga nalpas sadiay rehion. Kalpasan nga matukoy dagiti critical areas beaten iti geohazard maps ket maseknan itan ti MGB kadagiti “elements at risk” wenno dagiti maapektaran kas iti populasion, build-up areas ken
infrastructure systems, kas kadagiti dalan.

“Dakami ditoy MGB ket itultuloy mi ti nasaknap nga kampania iti impormasion ken panagadal kadagitoy nga geohazard maps agingga kadagiti kababaan ken nalaka nga mabikbiktima a sektor tapno makabalanda kadagiti pagpeggadan sadiay lugar da,” kuna ni Vecino.

Dagitoy napabaro nga geohazard maps ket mabalin nga makita ken ma-download a libre sadiay MGB website: http://www.mgb.ph/en/.

PIA-1/PMCJr.-ABN)