Gob Singson improklamarna iti EO ti pagannurotan para panagbiahe ti Ilocos Sur

March 21, 2021 Headlines

ILOCOS SUR – Improklamar ni Governor Ryan Luis Singson ti Executive Order (EO) No. 22 series of 2021 idi Marso 9 iti narebisa a travel protocols para amin nga sumrek iti probinsia ti Ilocos Sur.
Kadagiti amin a sumrek iti probinsia ket nasken a mangiprisintar iti identification card ken agrehistro iti Safe, Swift, and Smart Passage (SPaSS) Travel Management System nga dinebelop ti Department of Science and Technology iti https://spass.ph/clients/registration_captcha a kas onestop-shop application wenno communication para kadagiti agbiahe.
Para kadagiti government APORs (authorized persons outside of residence), nasken met a mangiprisintarda iti maysa nga orihinal wenno certified true copy iti travel authority wenno order nga inisyu ti Department Secretary wenno iti designated nga opisial na.
Iti travel order ken travel itinerary ket kanayunan a requirements para iti nongovernment APORs.
Malaksid iti ID ken rehistrasion iti S-PaSS, dagiti returning residents wenno overseas Filipinos ket masapul met nga makikoordinarda iti local government unit (LGU) nga pagnanaedanda para iti
panangisyu ti maysa a letter of acceptance.
Dagiti returning residents nga aggapu manipud luglugar a nasino kas “high risk” ken addaan naipadamag a kaso ti United Kingdom variant, iti LGU nga destinasion ket addaan awtoridad nga mangdetermina iti pamuspusan nga ipatungpalda iti masakupanda.
Dagiti lumablabas ken cargo drivers ken helpers ket masapul met nga mangipakita iti delivery receipts para kadagiti kargamento.
Bayat a dagiti bisbisita ken turista ket masapul nga agaplikar para iti travel coordination permits babaen iti S-PaSS.
Kanayun pay, dagiti turista ket nasken nga addaan iti booking confirmation manipud Department of Tourism Accredited Travel Agent ken negative RT-PCR (reverse transcription polymerase chain reaction) test nu aggapu manipud luglugar nga naipasidong iti enhanced community quarantine (ECQ), modified ECQ, ken general community quarantine nga naisyu iti uneg ti 72 oras sakbay ti panagbiahe.
Baeten kadagiti regulasion ti Department of Health, iti saliva test ket mabigbig a kas alternative specimen para RT-PCR kadagiti amin a Philippine Red Cross laboratories ken mapalubosan kas maysa a valid test iti probinsia, no la ket ta daytoy ket mausar iti uneg ti 72 oras apaman ti issuance daytoy.
Dagiti ubing a tallo a tawen pababa ket maisalsalumina manipud testing requirement sakbay ti iseserrek ti probinsia.
Malaksid kadagitoy a travel protocols, inyanunsio ni Governor Singson iti EO nga iti curfew hours iti probinsia ket manipud 12 iti rabii agingga 5 ti agsapa ken masapul a maipatungpal laeng kadagiti saan nga agtrab-trabaho.
Kamaudiananna, iti panaglamay ti natay a tao masapul nga masurot iti rekomendado nga panawen nga uppat nga aldaw manipud iti oras nga umuna a maipakita iti minatay. Nupay kasta, iti nasao a panawen ket mabalin nga mapawayway iti local chief executives dagiti LGU iti sidong ti nainsiriban ken nainkalintegan a kasasaad.
Para iti daytoy a panggep, awan a quarantine requirement iti masapul a maipataw kadagiti asinoman a miembro iti pamilia wenno kabagian ti natay nga aggapu manipud sabali a probinsia wenno pagilian.
(AMB-PIA IS/PMCJr.-ABN)