GOBIERNO TI ILOCOS SUR, COAST GUARD INLIBAKDA DAGITI SARSARITA TI BLACK SAND MINING

March 15, 2025 Headlines

VIGAN CITY, Ilocos Sur

Inlawlawag ti Ilocos Sur Provincial Government ken ti Philippine Coast Guard (PCG) dagiti nabiit pay nga operasion ti panagyakar iti
darat idiay ili ti Santa, a nangipaganetget a paset dagitoy ti napateg a river dredging project a nairanta a mangpabassit kadagiti peggad ti layus, saan nga ilegal a panagminas iti nangisit a darat. “Kalpasan ti naan-anay nga imbestigasion ken validasion ti PCG, naan-anay a
napatelgan a dagiti aktibidad a pagsasaritaan ket saan a pakairamanan ti panagminas iti nangisit a darat, no di ket maysa a lohistiko nga operasion gapu kadagiti teknikal nga isyu iti maysa kadagiti barko, ti MV Hong Hai 16, a temporario a nasalinong idiay ili ti Santa
gapu iti dakes a paniempo,” kinuna ti gobierno ti probinsia.

Daytoy ket kalpasan ti maysa a video a naiwaras iti online idi Marso 7 a mangipakpakita ti pannakayakar ti darat iti nagbaetan ti dua a dredging vessel a naisanglad idiay pagsangladan ti Santa. Kinuna ti PCG a ti MV Hong Hai 16 ket nagsagaba iti suction pipe damage, iti kasta malapdanna ti panangala iti darat iti naituding a dredging site-na, partikular idiay Caoayan, Ilocos Sur. Bayat ti kaaddana iti
pagsangladan, ti MV Yong Xin 1, sabali pay a dredging vessel, inyalis-na ti kargana iti darat iti MV Hong Hai 16, a nakutkot manipud Caoayan.

Kinuna ni Lt. Junior Grade Christopher Busilan, station commander ti Coast Guard idiay Ilocos Sur, “Maawatanmi a ti ladawan ti panagala iti darat ket agsirsirkulo ken mabalin a nakaigapuan ti pannakaseknan; nupay kasta, kayatmi a lawlawagen a ti panagala ket saan a napasamak iti danum ti Santa no di ket iti Caoayan dredging area, a dagiti nainget a pamay-an ket nasurot ken dagiti mainaig a dokumento ket maiparang met.” Kinunana, “Maysa pay, dagitoy a dredging vessels ket legal a mangibiahe dagiti kargada iti Pasay Reclamation Area kas paset ti naaprobaran a reclamation project.”

Idi Mayo 2024, dagiti aktibidad ti panagkutkot ket nangrugi idiay Caoayan a kas paset ti panagregget ti gobierno ti probinsia a mangpasayaat ti panagayus ti danum ken kamaudiananna ket mangisubli ti natural a kasasaad dagiti napunno iti lan-ak a kanal ti karayan Daytoy nga inisiatibo ket resulta iti nakaru a layus a napadasan kadagiti adu a barangay iti asideg ti Karayan Abra idiay ili ti Bantay a gapu
iti Super Typhoon Egay idi Hulio 2023. Gapuna, ti panangrugi ti proyekto a restoration ken desiltation a masarakan iti ngiwat ti karayan idiay Santa ken Caoayan iti igid ti Abra River.

“Nalawag ti imbestigasion: Awan ti black sand mining idiay Santa, Ilocos Sur, a mainaig iti agtultuloy a river dredging project. Amin nga aktibidad, agraman ti pannakayakar dagiti materiales, ket maaramid a nainget a panagtungpal kadagiti terms and conditions dagiti mainaig a katulagan iti nagbaetan ti gobierno probinsial ken ti dredging operator, kasta met dagiti maipakat a linteg ken pagannurotan a mangiturturay kadagiti kasta nga operasion,” innayon ti gobierno ti probinsia. Pinasingkedan manen ti gobierno probinsial ken ti PCG
ti panagkumitda a mangsalaknib kadagiti natural a gameng ti probinsia, a mangibagbaga a siguraduenda nga amin nga aktibidad iti baybay, agraman dagiti dredging operatons, ket agtungpal kadagiti agdama a linteg ken pagannurotan, aniaman a naipadamag a
panaglabsing ket naan-anay a maimbestigaran, ken dagiti maitutop a legal nga addang ket maaramid.

(JMCQ, PIA Ilocos/PMCJr.-ABN)