Hay naku…kaskay la VIRUS…!

March 29, 2020 Sirmata ken Tagtagainep ni Mang Gusting

Naimbag a malem, agsapa, wenno rabii yo amin kakaarruba, gagayyem ken kaginginnura hehehe…sapay la koma ta napia kay latta a kanayon nangruna kadagiti sukimi iti ABN READERS….Mag-an kayo met kadagiti luglugar yo…?

Kumusta metten ti biag tayo kailian… Kumusta kayon Kakayong, Kakailian…ania met ti madamag kadagiti luglugar yo..maipatpatungpal kadi met laeng ti ENHANCE COMMUNITY QUARANTINE dita?

Nagdakkel a parikut ti insangbay daytoy a covid-19 saan laeng a ditoy pagilian wenno ilii tayo ngem ketdi, entero a lubong..isu nga indeklaran ti WHO kas PANDEMIC wenno sangalubong ti nadalapusen daytoy saan a makita a kabusor ti tao.. naim-imbag pay diay agtatakaw wenno managdakdakes wenno tay mangtungpa wenno mangpasubsob kenka ta makitam…ngem daytoy covid19..saan…saan pay a marikna a a dagus ti sintomas na..marikna laeng inton medio nakaron ti epektona..

Adu met dagiti ibagbagada ken mabasbasa it Social Media a mabalin a first Aid wenno nainsigudan a remedio tapno saan a lumanlan ti marikrikna..mabalin tayo met a padasen..ta idi ket agpannuray met ti tao kadagiti ag-agas it arubayan ken ania pay a remedio, Kakayong..Ngem kas iti ibalbalakad dagiti taga AHENSIA TI SALUNAT…panagdaldalus ti kangrunaan..agugas a naimbag iti Ima..agdalus iti arubayan ngem ti kunami..Nadalus a KARARUA..

Ditoy pagilian tayo..ar-aramiden amin dagiti liders tayo ti kabaelanda tapno saan a lumanlan ti apektaran ti nasao a makapatay a Virus wenno kalaban a di Makita..immuna, naipaulog ti bilin ti kangatuan nga opisyal wenno ti Pangulo kuna tayo man laengen..isu ti pannakaipatungpal ti ENHANCE COMMUNITY QUARANTINE..malapdan dagiti umili a rummuar kadagiti pagtaengan…maysa ta ti rumuar tunggal pamilia..rummuar laeng no mapan gumatang iti agas, makan, mapan iti bangko.

Ngem adu ti nagreklamo…kisio awan kanu ti makanda..napalubosan met dagiti makuna a health workers, dagiti kameng ti polisia ken armada tapno add a mangmintinar iti urnos ta segurado nga adu ti sulpeng…kasda la virus..adu latta ti saan nga agtungpal ken pilosopo..dayta ti rigatna kadatayo..nakatangtangken ti ulo tayo..ngem inton addan dakes a mapasamak, satayto la agnakem ken agbabawi..ditoy siudad ti Baguio Kayong..iti agdama..kunada nga adda 4 a confirm a naapektaran iti COVID – 19 positibo kunada..isu a naingetan ti pammilin kadagiti amin a residente..adda met dua a natay a maatap a a naapektaran iti Covid-19..natay dagitoy kabayatan a maur-uray ti resulta ti eksaminasion kadakuada ket naamuan kalpasanna, a negatibo met gayam dagitoy iti COVId19…kayatna a sawen..saan a COVID-19 ti nakatayanda..bayat a masursurat daytoy a kolum tayo..madama pay laeng a maur-uray ti kompirmasion kadagiti dua a pasiente a maatap nga addan COVID-19.

Kabayatanna, Kayong Angkuan..mapanta man iti isyu maipapan iti EMERGENCY POWER a maited koma iti Presidente tapno ad-adda a maikkan iti bileg ti Presidente a mangipatungpal kadagiti makuna a measures tapno malpadan ti panagwaras ti COVID-19 ditoy pagilian…ngem daytoy ket masapul pay a maipasa iti kongreso ngem—ti saludsod..apay nga adda dagiti kumontra idinto ta pagsayaatan ti amin nga umili…kadagitoy a panawen…lipaten tayo pay laeng ti pinnulitika..Apo kayo met nga opisyal..kas kay la bayrus..imbes koma a makitinnulong kayon..adda pay manen rimuar nga isyu..ayan kanu dagiti dadduma a liders nangruna kadagiti
elected..ayanda..naglemmengda? mabutengda iti covid-19?

Sus..no gubat, dagiti opisyal ti adda iti sango a mangmando iti idadarup dagiti soldadona…saan ketdi nga agyan iti likud wenno aglemmeng..sus…no kasta met laeng ti aramidyo..ahgikkat kayon..awan serbiyo..

Iti sumaruno nga isyu tayo..intay to man kitaen dagiti isyu iti barbarangay maipapan iti relief distribution ta adda dagiti maipalpalapayag kadatayo nga unfair kanu..sus maria kusina..iti kastoy a tiempo..awan koma ti kasta..gapu ta saanen a bimmutos kenka idi barangay election..di mon inikkan it relief?

Opssss..nalpas ti ania kunada kayong angkuan…naimasan tayo manen ti nagiinstorya..manen mapanakon ta amangan no makitanak ni kapitan a nakaambay ditoy sango ti store ni Bannay ket maungtanak pay..bawal pay laeng ti agistambay gapu iti enhance community quarantine..agawidtayon kakayong…. ..babayo..tsuptsup
muahmuah..