Hazard pay maawat ti Ilocos Norte health workers sakbay agibus ti 2019

December 9, 2019 Provincial

SIUDAD TI LAOAG, Ilocos Norte – Naimbag nga damag para kadagiti empleado ti provincial government- owned facilities iti probinsia ti Ilocos Norte. Sakbay nga agibus ti tawen nga 2019, dagiti health workers manipud iti Governor Roque B. Ablan Sr. Memorial Hospital (GRASMH) ken district hospitals sadiay Ilocos Norte ket makaawat iti hazard pay manipud Agosto agingga Disiembre.

Daytoy iti umuna a gundaway nga mangted iti gobierno ti probinsia iti nasao nga benepisio para kadagiti health workers. Daytoy ti sipapanakkel nga paragawag ni Dr. Roger Braceros, officer-in-charge iti GRASMH kapalasan iti budget deliberation nga naaramid idiay Sangguniang Panlalawigan Session Hall.

“We appreciate our governor and thank the provincial government for giving us hazard pay. This helps a lot for our hospital personnel,” kuna ni Braceros. Dinutokan ni Governor Matthew Maercos Manotoc ni Braceros kas executive director iti Provincial Health Council tapno maipasigurado iti umno nga implementasion dagiti plano ken programa iti sidong ti health reform agenda ti gobierno ti probinsia.

Kabayatan iti umuna a 100 aldaw a report ti gobernador ti Ilocos Norte ket inaklonna iti peggad ken rigat iti panagserbi iti sektor ti salun-at publiko. Nangisayangkat met iti ubing a gobernador iti inspeksion sadiay provincial hospital tapno maaywanan iti inaldaw nga operasion daytoy.

“The problems are even bigger problem than I thought. So I hope the partial payment of hazard pay will make them happy,” kuna ni Manotoc.

Plano ni Manotoc nga mangala pay ti ad-adu nga doctor, pharmacists ken nurses tapno matungpal iti kasapulan a panagpabaro nga mapabenepisiaran ti umili nga Ilokano. Daytoy a tawen, inyaplag ti gobierno probinsial iti doctor scholarship nga mangted gundaway kadagiti agbalin a dodoktor nga agserbi iti probinsia.

MJTAB-PIA-IN/PMCJr.-ABN