IDAGADAGNA TI BFP BABAEN TI ‘CODE RED’ ITI PANAGUSAR KADAGITI ALTERNATIBO A MANGPARNUAY TI UNI

December 28, 2024 Headlines

LAOAG CITY

Idagdagadag ti Bureau of Fire Protection (BFP) iti publiko nga agusar kadagiti alternatibo a mangpataud ti uni kas kadagiti trumpeta wenno panagbatingting kadagiti kalub ti kaldero a pangkablaaw iti baro a tawen. Ti bureau ket naka- Code Red manipud Disyembre 23, 2024 agingga iti Enero 1, 2025. “Inaldaw nga agrikus dagiti fire truck-tayo tapno maipalagip iti publiko dagiti fire safety tips,” kinuna ni fire officer Franklin Calica ti BFP-Ilocos Sur provincial
headquarters.

Kas paset ti “Oplan Paalala: Iwas Paputok” ti BFP, ninamnama ni Calica ti maysa pay a tawen a zero firecracker-related incident ita a tawen. Tapno maliklikan ti uram kadagiti balbalay gapu iti paputok, mabalin nga isagana dagiti umili dagiti fire extinguisher wenno balde ti danum a dagus a mausar no adda uram, innayonna. Maibalakad met kadagiti sangakabbalayan nga addaan iti atep nga “anahaw” (bulbulong ti palma) a basaen ti atep maysa nga oras sakbay ti panagrambak ti Baro a Tawen kas panagannad no bilang ta matnag ti nasilawan a paputok iti atep.

Iti Ilocos Norte, agtultuloy ti inspeksion dagiti personnel ti BFP kadagiti aglaklako iti firecracker tapno makumpiskarda ti aniaman nga illegal a paputok, kitaenda ti permit da nga aglako, ken siguraduen nga adda
emergency fire extinguishers kadagiti tiendaan da. Dagiti maiparit a paputok ket pakairamanan ti watusi wenno
dancing firecracker, piccolo, pop pop, Super Lolo, boga, dakkel a sinturon ni Judah, Goodbye Philippines, Mother Rockets, Lolo Thunder, pillbox, Big Bawang, kwiton, kabasi, Atomic Bomb, five star, pla-pla, og, giant whistle bomb, ken awan etiketa a paputok.

Kas sagudayen ti Republic Act No. 7183 wenno ti linteg maipapan kadagiti pyrotechnic devices, dagiti tattao a matiliw nga agar-aramid, aglaklako, agiwarwaras, ken gumatang iti illegal a paputok ket mabalin a maibalud manipud innem a bulan agingga iti makatawen, ken mabalin a mamulta manipud PhP20,000 agingga iti PhP30,000.

(LA-PNA Ilocos/PMCJr.-ABN)