ILOCOS NORTE AGSAGSAGANA PARA ITI 2025 PALARONG PAMBANSA

LAOAG CITY, Ilocos Norte

Agtultuloy ti panagsagana ti Provincial Government ti Ilocos Norte ken ti Department of Education (DepEd) para iti 2025 Palarong Pambansa, tentatibo a naituding inton Abril 24 agingga iti Mayo 1. Inbalabala ni Ilocos Norte Gobernador Matthew Marcos Manotoc iti tallo a kangrunaan a prioridad para iti pasamak: ti pagimbagan ken kinatalged ti atleta, kinatalged ti aglawlaw, ken digital a panagbalbaliw. “Kayatmi a siguraduen nga umuna ken kangrunaanna, maasikaso dagiti atletami tapno komportableda.

Maikadua, ti tematayo ket mataginayon kas iti Renewable Capital of the Philippines, isu a kayattayo nga eco-friendly dagiti ay-ayamtayo. Ket maikatlo, ti panang-leverage iti teknolohia. Kayatmi ti mangaramid iti app a pakasarakan ti publiko iti impormasion para iti Palarong Pambansa,” kinunana. Inpakaammo ti gobernador a maikabil dagiti basura a pagibellengan kadagiti lugar a paggay-ayaman ken pagdagusan tapno maitandudo ti umno a panangtarawidwid iti basura.

Pinaregtana met ti pannakausar dagiti mausar  manen a materiales tapno maksayan dagiti single-use plastics bayat dagiti ay-ayam. Innayon ni Manotoc a suksukimatenda dagiti kanayonan nga inisiatiba tapno ad-adda nga eco-friendly ti Palarong Pambansa ita a tawen. Apaman a maipatungpal, pasayaaten ti aplikasion ti pasamak babaen ti
panangipaayna iti publiko iti nalaka a pannakagun-od kadagiti eskediul ken lugar ti ay-ayam, a mangpaadu iti agbuya ken suporta para kadagiti lokal nga atleta.

Manamnama a makaawis ti agarup 15,000 a makipaset iti nasao nga ay-ayam, pakairamanan dagiti atleta, coaches, ken opisial ti DepEd manipud iti intero a pagilian. Tapno maakomodar ti nasao nga aktibidad, madama ti
pannakatarimaan kadagiti kangrunaan a pasilidad kas iti Ferdinand E. Marcos (FEM) Memorial Stadium ken
Centennial Arena. Inbinglay pay ni Gobernador Manotoc dagiti planona a mangpaadu iti panagtayab iti Ilocos Norte iti panangsegga iti panagakar dagiti bisita. Iti agdama, dagiti direkta a panagtayab ket mangikonektar laeng ti Manila
iti Siudad ti Laoag.

“Gapu iti kinapudno nga adu a Filipino ti agturong idiay Ilocos Norte para kadagiti ay-ayam, kayatmi nga ipakita ti
kasayaatan iti probinsiami— uray no ti kulturatayo, dagiti salami, dagiti kumakantami, dagiti lokal a produktomi,
wenno ti gastronomiatayo. Isu a daytoy ti mangipakita iti Ilocos Norte iti kadakkelan a lebel,” kinuna ni Manotoc.
Agtultuloy nga imprastruktura ken lohistika Kabayatanna, impaganetget ni DepEd Schools Division of Ilocos Norte (SDOIN) sports coordinator Gene Reginaldo ti kinapateg ti pannakitinnulong iti gobierno probinsial.

“Siguraduenmi nga adda umdas a pagay-ayaman tapno maakomodar amin nga ay-ayam bayat ti Palarong Pambansa. Ita pay laeng, agsapsapulkami laeng kadagiti alternatibo a lugar a pagay-ayaman nga orihinal a naikeddeng iti mall a maibangbangon ditoy no la ket ta saan a magun-odan iti umiso a tiempo. Maileppas tayo dagiti playing venues inton Marso 31,” kinunana. Innayonna a makikoordinar ti DepEd kadagiti lokal nga autoridad ken
pannakabagi ti linteg tapno maigarantiya ti naannayas ken natalged a panagtaray ti nasao nga aktibidad.

Ti Palarong Pambansa, tinawen a maangay manipud idi 1948, ti kadakkelan nga isports event iti pagilian para kadagiti estudiante-atleta. Inorganisar ti DepEd, panggepna nga itandudo ti physical education, matakuatan dagiti athletic talents, ken mangpataud iti camaraderie kadagiti agtutubo nga atleta. Makisalip dagiti makipaset manipud iti nadumaduma a rehion kadagiti isports kas iti athletics, ball games, swimming, ken dadduma pay, a ti event ket
maangay iti sabali a lugar iti kada tawen.

Napateg ti agtultuloy a panagregget ti gobierno probinsial ken ti DepEd iti panagsagana para iti 2025 Palarong Pambansa tapno masigurado ti balligi daytoy. Saan laeng a ti panagdur-as ti isports ti nasion ti magunggonaan daytoy no di ket mangparang-ay pay iti turismo ken iti lokal nga ekonomia ti host province.

(EJFG, PIA Ilocos Norte/PMCJr.- ABN)

GIFT GIVING

Amianan Balita Ngayon