ILOCOS SUR SINUSPENDE ITI S-PASS A KASAPULAN PARA KADAGITI BIAHERO

December 11, 2021 Headlines

ILOCOS SUR – Sinuspender iti gobierno ti probinsia ti Ilocos Sur iti linteg a kalikaguman iti panangusar iti Safe, Swift, and Smart Passage (S-PaSS),maysa a travel management system para iti nalaklaka a pangpanggep ti contact tracing, para kadagiti agbiahe.
Pinasengkedan daytoy ni Dr. Trina Tabboga-Talaga, medical chief of the Ilocos Sur Provincial Hospital-Gabriela Silang idi Lunes kas paset tapno mapasimple ken mapalag-an iti travel protocols para kadagiti naan-anayen a nabakunaan a tattao.
“Effective today, wala po munang S-PaSS and Ilocos Sur. Kailangan lang po vax card and ID. Dapat po fully vaxxed tayo. Salamat,” kuna ni Tabboga- Talaga iti maysa a pammalakad. Gapu iti agtultuloy a panagbaba iti kaskaso ti coronavirus disease 2019 (Covid-19) iti probinsia, rinugianen iti gobierno ti probinsia a lukayan iti travel protocols bayat a paregtaen dagiti eligible population nga agpabakunan iti kabuklan a bakuna kontra Covid-19.
Epektibo idi Diciembre 1, imbilin pay ni Governor Ryan Singson iti panakaibasuran iti Covid-19 testing kasta met iti 14-aldaw a mandatory quarantine para kadagiti naan-anayen a nabakunaan a returning residents.
“Pamay-an mi daytoy a pammaregta kadagiti tattao tapno agpabakunada,” kinunana. Agingga idi Domingo (Diciembre 5), nairekord ti Ilocos Sur iti maysa laeng a baro a kaso ti Covid-19, maysa a kaso iti immimbag, ken awan iti natay.
Addaan ti probinsia iti 17,566 confirmed a kaskaso, nga addaan 17,344 nga immimbag, 51 aktibo a kaskaso, ken 171 iti nairekord a natay.
(LA-PNA Ilocos/PMCJr.-ABN)