INFLATION RATE TI ILOCOS BIMMABA ITI MAI-3 A DIRETSO A BULAN, NABANG-ARAN DAGITI PAMILIA ITI BADYETDA

April 19, 2025 Headlines

SAN FERNANDO CITY, La Union

Ti presio dagiti tagilako ken serbisio iti rehion ti Ilocos ket ad-adda a nain-inut nga agpangato, isu nga ad-adu ti magasto dagiti umili.
Segun iti report ti Philippine Statistics Authority a nairuar idi Abril 11, bimmaba ti inflation rate ti rehion iti 2.1 a porsiento idi Marso 2025, a nangmarka iti maikatlo nga agsasaruno a bulan ti panagbaba. Kaipapanan daytoy nga adu a nasken a tagilako a kas iti taraon ken transportasion ket saan a ngumat-ngato ti presiona a kas iti kapartak idi, a mabalin a mangpalag-an iti badyet ti sangakabbalayan.

Idi Enero, ti implasion ket adda iti 2.9 a porsiento, kalpasanna bimmaba iti 2.5 a porsiento idi Pebrero. Inlawlawag ni Camille Carla
Beltran, PSA Region 1 Chief Administrative Officer, a ti nabiit pay a panagbaba ket gapu iti nabannayat a panagngato ti presio kadagiti nadumaduma a grupo ti tagilako kas iti food and non-alcoholic beverages, transportasion, personal a produkto ti panangtaripato,
kawes, ken nadumaduma a tagilako ken serbisio.

Dagiti food items a nakatulong a nangguyod pababa iti inflation rate ket pakairamanan ti bagas, mais, tinapay, pasta, karne, lana ken taba, nakasaganan a taraon (ready-made meals), ken dadduma pay a naproseso a taraon. Imbaga pay ni Beltran nga awan ti nairekord a panagngato ti presio iti tallo a kangrunaan a grupo: serbisio ti edukasion, serbisio ti restawran ken akomodasion, ken pinansial a serbisio.
Kadagiti probinsia iti rehion, ti Ilocos Norte ket nangiposte ti kababaan nga inflation rate iti 0.9 a porsiento, a sinaruno ti La Union (1.5%),
Pangasinan (2.3%), ken Ilocos Sur (3.0%).

“No idilig iti bukodda a lebel idi Marso 2024, amin a probinsia—malaksid iti Ilocos Sur—ket nangirekord iti nababbaba nga implasion,” kinuna ni Beltran. Kas panglaglagip, idi Marso 2024, ti Ilocos Norte ket addaan iti implasion a 1.5 a porsiento, ti La Union 3.7 a porsiento, ti Pangasinan ket 2.5 a porsiento, ken ti Ilocos sur 0.6 a porsiento. Para kadagiti gagangay a trabahador, dakkel ti kaipapananna daytoy.
Kinuna ni Hobert Molina, maysa a konduktor ti bus manipud Santa, Ilocos Sur, a ti nababbaba nga implasion ti tumulong kenkuana a
mangyunnat iti kitana.

“Ti nababa nga implasion, nangruna para iti presio ti gasolina, kaipapananna a basbassit ti magastosko para iti gasolina ti bus, a tumulong
kaniak a makaurnong iti ad-adu ken addaan iti ad-adu ti mausarko iti dadduma a kasapulan,” kinuna ni Molina. Gapu ta lumag-an ti
implasion, dagiti pamilia ken trabahador iti Rehion ti Ilocos ket mabalinda a seggaan ti nataltalged a presio, nasaysayaat a panagekonomia, ken dakdakkel a panangtengngel kadagiti inaldaw a gastosda.

(CCMT, PIA La Union/PMCJr.- ABN