INFLATION TI ILOCOS TI DISIEMBRE 2024 2.9%, PROMEDIO TI INTERO A TAWEN – 2.1%

MALASIQUI, Pangasinan

Napardas ti rate ti panagngato ti presio iti Ilocos Region iti 2.9 a porsiento idi Disiembre 2024 manipud iti 1.8 a porsiento ti napalabas a bulan gapu iti panagngato ti presio ti taraon ken gasolina, ken dadduma pay. Iti sabali a bangir, nagbannayat ti promedio para iti tawen agingga iti 2.1 porsiento manipud iti 5.1 porsiento ti napalabas a tawen, impadamag ti Philippine Statistics Authority (PSA) idi Mierkoles. Iti palawag ni PSA Ilocos Region director, Atty. Sheila de Guzman, kinunana a ti nangatngato a presio dagiti nateng, ramut nga apit, plantain, dippig a saba ken bukbukel ti nakatulong iti panagngato ti presio ti taraon.

Imbagana a ti 156.2 a porsiento a panagngato ti presio ti kamatis idi napan a Disiembre, nangatngato ngem iti 23.9 a porsiento a panagngato idi Nobiembre. Kabayatan ti isu met laeng a forum, sinurot ni Department of Agriculture project evaluation officer Irene Tactac, ti panagngato ti presio ti kamatis iti nababa a suplay a gapuanan ti pannakariribuk ti paniempo iti maudi a kuarter ti 2024. “Bumaba dagiti presio inton agangay yantangay adda
dagidiay nagmula idi arinunos ti Nobiembre ken apitenda itan,” kinunana. Kadagiti probinsia, ti Ilocos Sur ti kangatuan ti inflation rate iti 5.1 porsiento, sinaruno ti Pangasinan, 2.8 porsiento; La Union, 2.4 porsiento; ken Ilocos Norte, 2.1 porsiento, innayon ni De Guzman.

(HA-PNA/PMCJr.-ABN)

Amianan Balita Ngayon