Kari ditoy, kari idiay

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN. Adda kami manen nga umay umabrasa kadakayo ket namnamaenmi ken ikarkararagmi a sapay koma ta
napia kayo latta a kanayon a sangbayan toy kulom tayo. Kumusta, mag-an kayo amin nga awan labasna. Nagasat nga aldaw kadakayo nga awan malabsan, sukimi.

Octobre 11, 2018. Umuna nga aldaw a panagipila iti kandidatura wenno Certificate of Candidacy dagiti agpangpanggep a pabotosan kadagiti nagduduma a posisyon wenno takem manipud senador agingga iti municipal councilor wenno Sangguniang Bayan. Agpaut laeng ti panagipila iti makalawas, Kayong, isu’t gapuna a partakam.

Kas intay napaliiw kadagiti naipadamag a nagipila, agsubli manen a pailayon dagiti nagpaso idin ken agpaso ita ti
takemda, dagiti kunada nga aggraduaten ta nalpasen ti tallo a terminoda. Adda nagpangato adda met dagiti bimmaba, kas koma agdama a senador, mapan iti congressman wenno gobernador. Apowww, unayen aya ta dida maibbatan ti pulitika nga uray adda pay dagiti makuna a laklakayudanen. Ti salodsod, ania ngata a talaga ti rason, kayatda latta nga agtultuloy ti panag-serbi wenno panagpublic service da wenno adda sabali nga agenda wenno
rasonda? Kuna dagiti dadduma, kayatda latta ti agsubli-subli nangruna iti posisyonda ta adda kalkalubanda? Ania
daydiay, adobo? Hahahaha.

Adu met ketdi kadagiti pulitiko ti sipupudno ken sipupuso nga agserbi ngem, puera delos buenos kakayong, adda latta met dagiti makuna a personal laeng ti rasonda, adda met dagiti agbakanang wenno gapu laeng iti pirak wenno saan kayatda laeng a tenglen ti amin a banag iti masakupanda. Hay naku kayong, maulawaksa Mildred, nagbalinsan a kastoy ti cycle ti pulitika ditoy pagilian tayo nga agpapan iti barangay. No aglast term tay kapitan, tumaray a kagawad, inton sumaruno agsubli manen a kapitan wenno saan ni baketna ti pagtarayenna ket kagawad met kenkuana. Inton umay a barangay elections isu manen. Sus maria kusina, dida koma met ipasublat iti sabali, awan la kadin sabali a makabael? Sabagay, ditay la ammo met no pudno nga awan sabalin a pagpilian dagiti bumarangay.

Saan met ketdin a nakaskasdaaw ta adda pay nagpresidente a timmaray manen a congresswoman. No kadagitoy nangangato a posisyon ngamin adda diay kunada nga immunity rights da no bilang naidarumda. Ngem por delikadesa koma metten, a, husto koman nangruna no naidarumka iti corruption. Dalusam pay nga umuna ti
naganmo. Iti sabali a bangir, adda met dagiti naparitanen a tumaray wenno kumandidato nga agingga iti iseserrekda iti aniaman a posisyon wenno trabaho iti gobierno ket maparitandan ngem adda nadamagmi a nagipilansa manen wenno agipila manen iti kandidaturana kas mayor iti lugarda. Sus maria santisima aya. Ania la unay ti adda iti
pulitika ta nagpigsa ti awisna, maulawaksa Mildred a talaga. Ala, ala, adda met ketdi kadagiti kailiantayo daytan. Adda kadakuada no asino ti pilienda ket awanto koma’t pababasolenda no biddut manen ti naikur-itda.

Sus nalpas ti ani, anak ti tukling a balo, kasta pay kakayong ta ne overtime tayo manen…ala, aglisi ka man dita Atong, ania man ta isensenyasmon? Anunsio iti hueteng…ala kalagem ngarud tay opisyal a takrot! Kasta pay… babayoo, tsup tsup muahmuah.

Kari ditoy, kari idiay

Now you get it

Sirmata ken Tagtagainep ni Mang Gusting

Amianan Balita Ngayon