Kari ditoy, kari idiay – Part 3

October 27, 2018 Opinion Sirmata ken Tagtagainep ni Mang Gusting

Naimbag nga oras yo amin kakaarruba, kakabagyan kakayong ken aminen a mangtartarabay iti kolum tayo ditoy ABN, adda kami manen nga umay umabrasa kadakayo ket namnamaenmi ken ikarkararagmi a sapay koma ta napia kayo latta a kanayon a sangbayan toy  kulom tayo. Kumusta, mag-an kayo amin nga awan labasna, nagasat nga aldaw kadakayo nga awan malabsan, sukimi.

Nalpasen ti panagpipila iti kandidatura para iti mid-term election 2019, Kayong Angkuan, ngem dimo pay mabalin a rugyan ti agkampania. No saanak nga agbiddut, inton Marso pay laeng para kadakayo a local candidates, umun-una dagiti agtaray para senador. Nupay kasta, adda latta dagiti nalimed a kumidda-kidday ditan ken pumalpaludip a padam a kandidato, adda met dita dagitay KBL a kunada. Sus, saan a partido daytoy Kayong, sabali ti kayat a sawen dagitay sutil iti daytoy, hahahaah, isu kanu dagitay kandidato a mahilig ken masarakam kadagiti Kasaran, Buniagan, Lamayan hahahahaha.

Puwera de los Buenos a kunada, batu-bato sa langit ang tamaan bukol este huwag magagalit. Adu met ngamin ti kasta, uray saanda a naawis no adda nadamagda a buniagan, makitam ida. Saan a bale ti lamayan ta okey laeng, wenno kasaran…ninong ditoy ninang idiay, piman aya, ipamuspusanda latta tapno laeng mangabakda ngem, ala, nasaysayaat laengen ti kasta ngem tay gatangenda ti botos mo, nababa la unayen panagkitkitada iti padada a tao. No addanto man umasideg kadakayo a mangyawat iti kuarta a ti katukadna ket panangikur-it mo iti naganna, ti makunak, kaarruba sige gammatam ta kuarta ngem sanamo nga ikur-it ti naganna ta segurado, saanak la ketdi nga agbiddut, inton nakatugaw dayta, kurakot ditoy kurakot dita ti pamay-anna tapno mapasublina ti dakkel a gastosna.

Malaksid iti panaggatang iti botos dagiti dadduma a kandidato, kari ditoy kari idiay ti pamay-anda, kurangna laeng nga ibagada nga agpaaramid da iti rangat iti toktok ti bantay…no idi kunada nga agaramid da iti rangtay nga uray awan karayan, addan Kaarruba, addan dagiti overpass wenno kalpasada iti law-ang…isu dagitan dagidiay kalsada a naaramid iti ngatuen ti kalsada.

Ngem kitaen yo a nasayaat kailian no kari ditoy kari idiay a narigat a mapasamak ti ibagbagda wenno impossible a kunatayo ta bullilikong dayta. Umuna nga intay kitaen ket no tay kandidato ket talaga a relihiosio, saan a sumrek laeng iti simbaan no tiempo ti kampania. Kitaen yo met no ania ti family background na, amangan no sangapulo met ti asawana hahaha wenno sangapulo ti ina-una nga anakna. Saan laeng a dayta, kitaen tayo met no pudno a naaramidnan dagiti karina idi damuna ti agkandidato ket kayatna manen ti mailayon wenno ag-re-elect. Kitaen yo no adda met la maysa a natungpal kadagiti karina idi wenno pulos nga awan. Adu ti mabalin tayo a pagpilian a kandidato Kaarruba isu nga agbalin tayo koma met a vigilante a kunada ta oras a nagbiddut tayo, took a tallo tawen manen dayta.

Maudi nga inkam maibati kakailian, kitaen yo pay no dayta a kandidato ket adda met laeng panangilalana iti nakaparsuaan wenno awan ta dayta ti maysa koma nga ipangpangruna ti maysa nga opisyal, ti pannakatagibin ti nakaparsuaan a nabayagen a narames wenno naidadanes gapuanan dagiti naranggas.

Sus nalpas ti ani, anak ti tukling a balo, kasta pay kakayong ta ne overtime tayo manen ket…aglisi ka man dita Atong…ania man ta isensenyasmon? Anunsio iti hueteng… agingga ita, dayta pay laeng ti ubram, ala, ala, kalagem man ngarud tay opisyal a kalbo hahahaha. Kasta pay ket ne, nakaadu tayo manen, babayoo tsup tsup muahmuah.