Konsilio ti Ilokano, inurnos ti La Union

April 29, 2017 Headlines

SIUDAD TI SAN FERNANDO, La Union – Naiyurnos ti La Union Council for Language and Culture (LUCLC) tapno aglalo pay a maital-o ken masalimetmetan ti pagsasao ken kultura dagiti Ilokano.
Nakipaset ditoy dagiti pannakabagi manipud iti probinsial a gobierno, academia, national government agencies, media, ken pribado nga institusion.
Tapno papigsaen pay ti panangipateg iti lengguahe nga Ilokano, agtultuloy nga isaysayangkat ti probinsial a gobierno ti Ayat Festival manipud idi 2011. Ti nakuna a festival ket naitunos iti foundation anniversary ti probinsia.
Segun kenni Adamor Dagang, provincial information and tourism officer, mangrugi ita a tawen, ti Ayat Festival ket maisayangkat iti bulan ti Agosto a pakaobserbaran met ti Buwan ng Wika.
Kangrunaan a paset ti festival ti pammadayaw kadagiti nangabak iti “Kampeon ti Lengguahe Award”. Gandatna a bigbigen dagiti umili ken entidad a nasiglat a mangisakit, mangpabileg ken mangtan-ay ti Ilokano ken mangiyaddang iti pannakausar ken kinapateg daytoy.
Mangrugi ti Language Services Unit iti La Union Information and Tourism Office nga umawat kadagiti nominasion manipud Mayo inggana Hunio. Maala ti dadduma pay a detalye ken downloadable forms iti official website ti probinsia nga www.launion.gov.ph.
Malaksid kadagiti pasalip kas ti kantarap (Ilokano rap and song contest), Iskrabiloko (Ilokano scrabble tournament), La Union Henio (Ilokano version ti Pinoy Henyo), ken Istoria Iloko (day care storytelling competition), adu pay dagiti aktibidad a maisagsagana para iti Ayat Festival.
Idi 2012, naaramid a paglintegan ti Provincial Ordinance 026-2012 wenno Iloko Code, a nangbigbig iti Ilokano kas opisial a lengguahe ti La Union ken tapno mausar ti Ilokano kas ti dadduma pay a national ken opisial a lengguahe.
Malaksid iti Ayat Fest, tarigagay ti probinsia iti panangidaulo ni Gov. Francisco Emmanuel Ortega III a mangisayangkat ti “heritage, cultural and linguistic mapping”.
“Methodology for the cultural mapping includes extensive research on the physical features of the place, flora and fauna, cultural practices, and logistical mapping, among others,” kuna ni Dr. Elizabeth Caliwanagan, ti University of the Philippines-Baguio ken maysa kadagiti founding members ti Council, kabayatan ti taripnongda. Joan Diaz-Sabado/PIA-La Union / ABN