Lalaki nakuryente sa kasagsagan ng ulan sa Baguio
LUNGSOD NG BAGUIO – Isinugod ng mga awtoridad sa ospital ang isang lalaki matapos itong tinamaan ng bumagsak na live wire sa Purok 2, Barangay Dontogan noong August 12, 2018.
Ang biktima ay kinilalang si Eduardo Jolen Sobremonte, 30 anyos, isang chef, at residente ng naturang lugar.
Ayon sa police report, ganap na 4:30 ng hapon nang naglalakad di umano ang biktima patungo sa bahay ng kanyang kaibigan sa Foggy Hill, Dontogan, nang ito ay tamaan ng naputol na live wire mula sa poste ng kuryente ng Benguet Electric Cooperative (Beneco), na hinihinalang naputol sanhi ng malakas na hampas ng hangin.
Ayon kay Nathan Natomay Langbis, unang nakakita sa biktima, nakahandusay diumano ito sa daan nang makita niya. Maagap naman itong tumulong at isinugod ang biktima sa Baguio General Hospital and Medical Center, kung saan kinumpirma na nagtamo ang biktima ng “minor burns at injuries” sa kanyang katawan. Sa kasalukuyan, maayos naman ang kundisyon ng biktima na patuloy na inoobserbahan ng mga doktor.
Samantala, agad namang rumesponde ang mga awtoridad mula sa Station 10 ng Baguio City Police na pinapangunahan ni PSC Elly De Vera na agad tinawag ang atensyon ng pamunuan ng Beneco para sa agarang aksyon.
Kasabay nito, para maiwasan ang anumang aksidente o sakuna ay nagbigay ang pamunuan ng Beneco ng paalala di lamang para sa mga nasa lungsod ng Baguio kundi pati na rin sa mga karatig-pook na kung may nakitang putol na kable ng kuryente o napansing kakaiba sa koneksyon ng mga wire lines na puwedeng magdulot ng sakuna, huwag subukang hawakan o lapitan at ireport agad sa kanilang customer welfare office sa numerong (074)-637-4400 o 637-4499, at pindutin ang number 1. DOROTHY M. REGINO, UC Intern
